ރައީސް މުހައްމަދު މުއިއްޒު އުޅުއްވަނީ ބުރަ މަސައްކަތުން ގެނައި ޑިމޮކްރަސީ މ.ދިމްޔާތައްލައި ފުނޑާލަން ކަމަށް ކުރީގެ ނައިބު ރައީސް ޑރ.މުހައްމަދު ޖަމީލް އަހުމަދު ވިދާޅުވެއްޖެއެވެ.
ޑރ ޖަމީލް މިފަދައިން ވިދާޅުވެފައި ވަނީ އެކްސްގައި ކުރެއްވި ޕޯސްޓެއްގައެވެ.
މުއައްސަސާތަކަށް ނުފޫޒު ނުފޯރުވާނެކަމަށް ވިދާޅުވެ ރައީސް މުއިއްޒު ކުރެއްވި ޕޯސްޓް ޝެއަރ ކުރައްވާ ޑރ ޖަމީލް ވިދާޅުވީ 19 ވަނަ ރައްޔިތުންގެ މަޖިލީހުގެ، އެމްޑީޕީގެ 13 މެމްބަރުން ގަތީ ދަމުނަމާދު ކުރަން ފަހަތުގައި ބައިތިއްބަންތޯއެވެ.
ރައީސަކީ ވާދަވެރި، ސިޔާސީ މީހެއްކަމަށާ ޚަލީފާއެއް ނޫންކަމަށް ވެސް ޑރ ޖަމީލް ވަނީ ޕޯސްޓްގައި ވިދާޅުވެފައެވެ.
ރައީސް މުއިއްޒަށް މިހާރުވެސް، ބާރުތައް ލިބުމުން މައުލޫމާތު ހާމަ ނުކުރާކަމަށާ ސަރުކާރުގެ އޮފީސްތަކުގައި މީހުންގެ ފޮއި ސޯޖްކޮށް ޕީއެންސީއަށް ފޯމް ފުރާކަމަށް ވެސް ޑރ ޖަމީލް ވިދާޅުވިއެވެ. އަދި ނުފޫޒް ފޯރުވައި ނަހަމަ ގޮތުގައި މުޅި ސަރުކާރު ބޭނުންކުރާކަމީ އެއްވެސް މީހަކަށް ނޭނގޭކަމެއް ނޫންކަމަށް ވިދާޅުވެ ޑރ ޖަމީލް ވަނީ މުއިއްޒަށް ފާޑުކިޔުން އަމާޒުކުރައްވާފައެވެ.
ރައީސް މުއިއްޒު އުޅުއްވަނީ ބުރަ މަސައްކަތުން ގެނައި ޑިމޮކްރަސީ ދިމްޔާތަށްލާ ފުނޑާލަންކަމަށާ މުއައްސަސާތަކަށް ނުފޫޒު ނުފޯރުވާނެކަމަށް ވިދާޅުވެ ރައީސް މުއިއްޒު ހެދީ އަނެއްކާވެސް ދޮގެެއްކަމަށް ޑރ ޖަމީލް ވަނީ ވިދާޅުވެފައެވެ.
