ޚަރަދު ކުޑަކުރަން ފިޔަވަޅުތައް އަޅަން ނިންމާފައި ވަނިކޮށް ރައީސް ޑރ.މުހައްމަދު މުއިއްޒުގެ އަނބިކަނބަލުން ސާޖިދާ މުހައްމަދު ޓެންޒެނިޔާއަށް ކުރައްވި ދަތުރުފުޅަކީ ދައުލަތުގެ ޚަރަދުން އެކަމާ މަޝްހޫރުކަން ހޯއްދެވުމަށް ކުރައްވާ ދަތުރުފުޅެއްކަމަށް ބުނެ ގިނަ ބަޔަކު އަންނަނީ ފާޑުވިދާޅުވަމުންނެވެ.
މީގެ ކުރިންވެސް ފަސްޓް ލޭޑީ ބައިވެރިވެވަޑައިގަންނަވާ އިވެންޓްތައް ކަވަރު ނުކުރާ މައްސަލައިގައި ރައީސް އޮފީސް މުވައްޒަފުންނަށް ފިޔަވަޅު އަޅާފައިވާ ކަމަށް މައުލޫމާތު ލިބިފައިވެއެވެ.
ދައުލަތުގެ ފައިސާއިން ހަރަދުކޮށްގެން ރައީސުންގެ އަނބިއަނބި ކަނބަލުން ރަސްމީ ދަތުރުފުޅުތަކުގައި ގައުމުން ބޭރުގެ ރަސްމިއްޔާތުތަކަށް ވަޑައިގަތުމަކީ މީގެ ކުރިން ކޮށް އުޅުނު ކަމެއް ނޫނެވެ. އަދި ރައީސްގެ އަނބިކަނބަލަކީ ރަސްމީ އެއްވެސް ހައިސިއްޔަތެއް އޮންނަ މީހެއް ވެސް ނޫނެވެ. ގާނޫނުން ކުރަން ކަނޑައަޅާފައިވާ ހަރަދު ފިޔަވައި ދައުލަތުގެ ބަޖެޓުން ރަސްމީ އެއްވެސް ކަމަކަށް ހަރަދެއް ކުރުމެއް ނޯވެއެވެ.
މަޝްހޫރު ކަން ހޯއްދަވަން މަސައްކަތް ކުރުމުގެ އިތުރުން، އިގްތިސާދީ ގޮތުން ދަތި ދުވަސްވަރެއްގައި ދައުލަތުގެ ފައިސާ ނަހަމަގޮތުގައި ބޭނުންކުރަމުންދާތީ ފަސްޓް ލޭޑީއަށް މީސްމީޑިޔާގައި ފާޑުކިޔުންތައް ދަނީ އަމާޒުވަމުންނެވެ.
މީގެ އިތުރުން، މިއީ ދައުލަތުގެ ފައިސާއަށް ޚިޔާނާތްތެރިވުން ކަމަށާއި މިއީ ދައުލަތުގެ ފައިސާ ނުހައްގުން ބޭނުންކުރަން މި ސަރުކާރުން ފަށާ އާ ސިލްސިލާ ސިޔާސަތެއް ކަމަށް ސިޔާސީ ތަޖުރިބާކާރުން އަންނަނީ ސިފަކުރައްވަމުންނެވެ.
