މި ސަރުކާރަކީ ނޫސްވެރިންނަށް ދުލާއި ޤަލަމުގެ މިނިވަންކަން ފުރިހަމައަށް ދޭނެ ސަރުކާރެއްކަމަށާއި، ނޫސްވެރިންގެ ޒިންމާ އަދާކުރަން މި ސަރުކާރުން ފުރިހަމައަށް އެއްބާރުލުންދޭނެކަމުގައި ނައިބު ރައީސް އަލްއުސްތާޛު ޙުސައިން މުޙައްމަދު ލަޠީފް ވިދާޅުވުމާއި ގުޅިގެން ގިނަ ބަޔެއްގެ ފާޑުކިޔުން އަމާޒުވެއްޖެއެވެ.

ނޫސްވެރިކަމުގެ އެވޯޑް ހަފްލާގައި ނައިބު ރައީސް މިހެން ވިދާޅުވިއިރު ސަރުކާރާއި ދެކޮޅު އަދި ސަރުކާރުން ކުރަމުން އަންނަ ނުރަނގަޅު ކަންތައްތަކުގެ ޚަބަރުތައް ގެނެސްދޭތީ އެފަދަ މީޑިޔާތަކާއި ދެކޮޅަށް ފިޔަވަޅު އެޅުމަށް ރައީސް އޮފީހުން އަންނަނީ ގޮވާލަމުންނެވެ.

މިގޮތުން، ރައީސް މުއިއްޒު ޕީއެންސީއަށް ނިސްބަތްވާ މަޖިލިސް މެންބަރުންނަށް ކޮރަޕްޝަން ފައިސާ ބަހަމުންދާކަމުގެ މައްސަލައިގައި ނެރުނު “ކަޅު ދަބަސް” ޑޮކިއުމެންޓްރީ މައްސަލައިގައި އަދަދު ނޫހަށް ފިޔަވަޅު އެޅުމަށް ސަރުކާރުން ވަނީ މަސައްކަތް ކޮށްފައެވެ.

މީގެ އިތުރުން ތޭރަ އޮންލައިން އިން ނެރުނު ‘ބެލްކަނީ ޑޮކިއުމެންޓްރީ’ މައްސަލައިގައި ވެސް އެ ޗެނަލްއަށް ވަނީ ދަތި ކުރުމުގެ އެތައް ފިޔަވަޅެއް އަޅާފައެވެ.

މިނިވަން ނޫސްވެރިކަމުގެ މާނަ ސަރުކާރަށާއި ނައިބު ރައީސަށް ނޭގެނީތޯ ގިނަ ބަޔަކު އަންނަނީ ސުވާލު އުފައްދަމުންނެވެ.