މޯލްޑިވްސް އިސްލާމިކް ބޭންކް (އެމްއައިބީ) ގެ އެސެޓް ވެލިއު ނިމިދިޔަ ކުއާޓަރުގައި 10.42 ބިލިއަން ރުފިޔާއަށް އަރާފައިވާ ކަމަށް އެ ބޭންކުން ބުނެފިއެވެ.

ބޭންކުން ނެރުނު ތިންވަނަ ކުއާޓަރުގެ ރިޕޯޓުގައިވާ ގޮތުން މިއީ އެ ބޭންކުގެ އެސެޓް ވެލިއު 10 ބިލިއަން ރުފިޔާއަށް އެރި ފުރަތަމަ ފަހަރެވެ. މިއާއެކު މިދިޔަ އަހަރުގެ މި މުއްދަތާ އަޅާބަލާއިރު އެސެޓް ވެލިއު 34 އިންސައްތަ އިތުރުވެފައިވެއެވެ.

އެމްއައިބީގެ ކުއާޓާ ރިޕޯޓުން ދައްކާ ގޮތުގައި އެ ބޭންކުގެ ފައިނޭންސިން ޕޯޓްފޯލިއޯ 5 ބިލިއަން ރުފިޔާއަށް ވަނީ އިތުރުވެފަ އެވެ. މިއީ، 2023ގެ 3 ވަނަ ކުއާޓަރާ އަޅާބަލާއިރު 45 ޕަސެންޓުގެ ކުރިއެރުމެކެވެ.

މި ރިޕޯޓުން ދައްކާ ގޮތުގައި މި އަހަރުގެ ދެވަނަ ކުއާޓަރާ އަޅާބަލާއިރު، އެމްއައިބީގެ ޑިޕޮސިޓްބޭސް 8 ބިލިއަން ރުފިޔާއަށް ވަނީ އިތުރުވެފަ އެވެ. މިއީ، ފާއިތުވެދިޔަ އަހަރެއްހާ ދުވަހުގެ ތެރޭގައި ލިބުނު 26 ޕަސެންޓުގެ ކުރިއެރުމެކެވެ.

މިދިޔަ އަހަރުގެ ތިން ވަނަ ކުއާޓަރާ ބަލާއިރު މި އަހަރުގެ ތިން ވަނަ ކުއާޓަރުގައި ބޭންކުގެ އާމްދަނީ ވެސް 51 ޕަސެންޓަށް ވަނީ ކުރިއަރައިފައެވެ.

އޭގެ އިތުރުން ތިން ވަނަ ކުއާޓަރު ނިމުނުއިރު، ސާފު ފައިދާގެ ގޮތުގައި 81.71 މިލިއަން ރުފިޔާ ލިބިފައިވާއިރު، އެއީ މިދިޔަ އަހަރާ އަޅާބާލާއިރު 53.76 ޕަސަންޓުގެ ކުރިއެރުމެކެވެ.

އެމްއައިބީގެ ސީއީއޯ އަހްމަދު ރިޒާ ވިދާޅުވި ގޮތުގައި މި އަހަރުގެ ހުރިހާ ކުއާޓަރެއްގައިވެސް ބޭންކަށް ބޮޑެތި ކުރިއެރުންތަކެއް ވަނީ ލިބިފައެވެ.

އެބޭންކުން ދަނީ ޓެކްނޮލޮޖީގެ އެހީގައި ބޭންކު ހިންގުމަށް ޒަމާނީ ބަދަލުތަކެއް ވެސް ގެންނަމުންނެވެ.

ބޭންކަށް ނުގޮސް އެކައުންޓު ހުޅުވުމާއި، އުޖާލާ ފައިނޭންސިންގެ ހުރިހާ ކަމެއް އޮންލައިންކޮށް ކުރެވޭ ގޮތަށް ބަދަލު ކުރުމުގެ އިތުރުން ބޭންކުގެ ބްރާންޗްތައް އިތުރު ކުރުމާއެކު ބޭންކުގެ ހިދުމަތް ހޯދުމަށް އެބޭންކުން ވަނީ ބޮޑެތި ލުއި ފަސޭހަތަކެއް ގެނެސްދީފައެވެ.