ވަކި ދާއިރާއަކުން ސަރުކާރަށް ހިދުމަތް ކުރަން ރައްޔިތުންނަށް މަޖުބޫރު ކުުރުމަކީ ޑިމޮކްރެޓިކް ނިޒާމާ ވަރަށް ބީރައްޓެހި އަމަލެއް ކަމަށް އިދިކޮޅު އެމްޑީޕީގެ ރައީސް އަބްދުﷲ ޝާހިދު މިއަދު ވިދާޅުވެއްޖެއެވެ.

ޝާހިދު މިހެން ވިދާޅުވެފައި މިވަނީ އޯލެވަލް ނިންމާ ކުދިންގެ ތެރެއިން އޭލެވަލްއަށް ނުދާ ކުދިންނާއި ވަޒީފާ ހޯދުމަށް ދަތިވާ ކުދިންނަށް އަސްކަރީ ތަމްރީން ހެދުމަށް މަޖުބޫރުވާ ގޮތަށް ހާއްސަ ގާނޫނެއް އެކުލަވާލުމުގެ މަސައްކަތް ކުރައްވަމުން ގެންދަވާ ކަމަށް ރައީސް ޑރ. މުހައްމަދު މުއިއްޒު ނަސްރު ދުވަހުގެ ޖަލްސާގައި ވިދާޅުވެފައި ވަނިކޮށެވެ.

އެކަމާ ގުޅުވައި އެކްސްގައި ކުރެއްވި ޕޯސްޓެއްގައި ޝާހިދު ވިދާޅުވީ، ސަލާމަތީ ހިދުމަތްތައް ޒަމާނާ އެއްގޮތަށް ތަރައްގީކޮށް، ކުރިއަށް ގެންދެވޭނީ ޢިލްމީ ގާބިލު ޒުވާނުންނަށް ވެސް އެ ހިދުމަތް ދޭން ފުރުސަތު ލިބިގެން ކަމަށެވެ.

ޝާހިދު ވަނީ އުފެއްދުންތެރި ޖީލެއް ބިނާކުރުމަށް އޮތް ރަނގަޅު ގޮތަކީ ޒުވާނުންގެ ހުނަރުތައް ތަރައްގީ ކުރުމަށް މަގުފަހިކޮށްދިނުން ކަމަށާއި ވަސީލަތްތައް ހޯދައިދީ، ފުރުސަތު އިތުރުކޮށްދިނުން ކަމަށްވެސް ވިދާޅުވި އެވެ.

ޝާހިދު މިފަދައިން ވިދާޅުވިއިރު، ރައީސް ޔާމީން ވެސް ވަނީ މުއިއްޒުގެ މި ނިންމުމަށް ވަރަށް ބޮޑަށް ފާޑުވިދާޅުވެފަ އެވެ.

އެމަނިކުފާނު ވިދާޅުވީ ފުލުހުންނާއި ސިފައިންނަކީ ވަރަށް ޒިންމާދާރު އަދި ސްޓްރެޓެޖިކް މަސައްކަތްތަކެއް ގައުމުގެ ދިފާއުގައި ކުރަމުންދާ ބައެއް ކަމަށެވެ. އެހެންކަމުން އެ ތަންތަނަށް ހޯދަންވާނީ އިލްމީ ގާބިލް މީހުން ކަމަށްވެސް ވިދާޅުވި އެވެ.

ރައީސް ޔާމީން ވިދާޅުވީ ސިފައިންނާއި ފުލުހުންނަކީ އަބަދު މަގުމަތީގައި އެނބުރެންޖެހޭ ބައެއް ކަމަށް ދެކިގެން ނުވާނެ ކަމަށެވެ. އަދި އެ ދެ މުއައްސަސާއަށް ބޭނުންވާ ވަސީލަތްތަކާއި ދޭންޖެހޭ އެހީތެރިކަމާއި އެއްބާރުލުން ދޭންޖެހޭނެ ކަމަށްވެސް ވިދާޅުވި އެވެ.

ރައީސް ޔާމީންގެ ވާހަކަފުޅުގައި ވަނީ ރައީސް މުއިއްޒު ވިދާޅުވާ އަދަދެއް ސިފައިންނާއި ފުލުހުންގެ ހިދުމަތަށް މީހުން ބޭނުންވާނެ ކަމާ ދޭތެރޭ ސުވާލުވެސް އުފައްދަވާފަ އެވެ. އެގޮތުން ރައީސް ޔާމީން ވިދާޅުވީ އެ އަދަދަށް މީހުން ބޭނުންވާ ކަމަށް ފުލުހުންނާއި ސިފައިން މީގެކުރިން ބުނެފައިވެސް ނުވާ ކަމަށެވެ.

އަދި ދައުލަތުގެ ހަރަދުތައް ވަރަށް ބޮޑަށް ކުޑަކުރަންޖެހިފައި ވަނިކޮށް ސިފައިންނާއި ފުލުހުންގެ އަދަދު އިތުރުކޮށްގެން ބަޖެޓްގެ ހަރަދުތައް ދެކޮޅު ޖައްސާނެ ގޮތެއް ނޯންނާނެ ކަމަށްވެސް ވިދާޅުވި އެވެ.

ނުކިޔަވާ މީހުން ދިފާއީ ބާރަށް ވެއްދުމަށް ރައީސް މުއިއްޒު ހިތްވަރު ދީ ދެއްކި ވާހަކަތަކަށް އެމަނިކުފާނަށް ވަނީ އާންމުންގެ މަލާމާތާއި ފާޑުކިޔުން އަމާޒުވެފަ އެވެ.