ސަހްޔޫނީންގެ ދިފާއީ ވަޒީރު ޔޯވް ގަލަންޓް މަަގާމުން ދުރުކޮށްފިއެވެ.

ޑިފެންސް މިނިސްޓަރުގެ މަގާމުން ގަލަންޓް ވަކި ކުރުމަށްފަހު ބޮޑުވަޒީރު ނަތަންޔާހޫ ވިދާޅުވީ ބޮޑުވަޒީރާއި ޑިފެންސް މިނިސްޓަަރާއި ދެމެދު އިތުބާރު އޮންނަން ޖެހޭ ކަމަށާއި ދެބޭފުޅުންގެ މެދުގައި އުފެދުނު ހިޔާލު ތަފާތުވުންތަކާއެކު ކުރިއަށް ނުދެވުނީ ކަމަށެވެ.

ގަލަންޓްގެ ބަދަލުގައި ޑިފެންސް މިނިސްޓަރު ކަމަށް އައްޔަންކުރީ ހާރިޖީ ވަޒީރު އިސްރާއީލް ކާޓްޒް އެވެ. ހާރިޖީ ވަޒީރަކަށް އައްޔަންކުރީ ވަކި ވުޒާރާއެއް ހަވާލުނުކޮށް ހުރި ގިޑިއޯން ސާރް އެވެ.

ދިފާއީ ވަޒީރަކަށް އަލަށް އައްޔަން ކުރި "ބުލްޑޯޒާ"ގެ ނަމުން މަޝްހޫރު ކާޓްޒް އަކީ ވަރަށް ހަރުކަށި ނަތަންޔާހޫއާ ގުޅުން ރަނގަޅު މީހެއް ކަމަށް އިޒްރޭލާއި ހުޅަނގުގެ މީޑިއާތަކުން ރިޕޯޓުކުރެ އެވެ.

ޑިފެންސް މިނިސްޓަރުގެ މަގާމުން ދުރުކުރިއިރު، އީރާނުން ތާއީދުކުރާ ލުބުނާނުގެ ހަތިޔާރުއެޅި ޖަމާއަތް ހިޒްބުﷲ އިން ނަތަންޔާހޫއާއި އޭނާގެ އަންހެނުން މަރާލަން ވަނީ ހަމަލާއެއް ދީފަ އެވެ.

އެ ހަމަލާ ދިނުމުގެ ކުރިން ސަހްޔޫނީން ބުނެފައިވާ ގޮތުގައި ލުބްނާން ތެރެއިން ތިން ޑްރޯނެއް ސަހްޔޫނީންގެ މެދުތެރެއަށް އަމާޒުކޮށް ފޮނުވިއެވެ. އޭގެ ތެރެއިން ދެ ޑްރޯނެއް އިންޓަސެޕްޓްކޮށް ވައްޓާލެވުނަސް ނަތަންޔާހޫގެ ގެޔާ ދިމާލަށް ފޮނުވާލި ޑްރޯން ވައްޓައެއް ނުލެވުނެވެ.

ނަތަންޔާހޫގެ ގެއަށް އެ ހަމަލާދިންއިރު، ސަހްޔޫނީން ވަނީ ޣައްޒާގެ ވެރިކަން ކުރާ ހަމާސް ޖަމާއަތުގެ ލީޑަރު ޔަހުޔާ ސިންވާރު ޝަހީދުކޮށްލާފައިވާކަން ނިމުނު މަހުގެ 17 ދުވަހު އިއުލާނުކޮށްފައެވެ. އޭގެކުރިން އިސްރާއީލުން ވަނީ ހިޒްބުﷲގެ ލީޑަރު ޝައިހު ހަސަން ނަސްރުﷲވެސް ޝަހީދުކޮށްލާފައެވެ.

މިދިޔަ އަހަރު އޮކްޓޫބަރު ހަތް ވަނަ ދުވަހުން ފެށިގެން ސަހްޔޫނީން ފަލަސްތީނުގެ ޣައްޒާއަށް ދެމުންގެންދާ ހަމަލާތަކުގައި މިހާތަނަށް 43،600 އަށްވުރެ ގިނަ މީހުން ވަނީ ޝަހީދުކޮށްލާފައެވެ.