ރައީސް އަބްދުﷲ ޔާމީން އަބްދުލްގައްޔޫމް އަކީ ދިވެހިރާއްޖެ ދުށް އެންމެ ވަރުގަދަ އިކޮނޮމިސްޓް ކަމަށާއި އެމަނިކުފާނުގެ އިގްތިސާދީ ވިސްނުމާއި، އިލްމު އަދި ތަޖުރިބާ ދިވެހި ގައުމަށް ބޭނުންވާ ކަމަށް ކުރީގެ ނައިބު ރައީސް ޑރ މުހައްމަދު ޖަމީލް އަހްމަދު ވިދާޅުވެއްޖެއެވެ.

ރާއްޖެ ޓީވީގެ "ފަށާއިރު" ޕްރޮގްރާމަށް ރައީސް ޔާމީން ދެއްވި ޚާއްސަ އިންޓަވިއު އާއި ގުޅިގެން ޑރ ޖަމީލް އެކްސްގައި ޕޯސްޓްކޮށް ވިދާޅުވީ އެމަނިކުފާނު ދެއްވީ ވަރަށްވެސް ފުރިހަމަ އަދި ސާފު ޖަވާބުތަކެއް ކަމަށެވެ.

ރައީސް ޔާމީންގެ ވާހަކަފުޅުން އެމަނިކުފާނު ގައުމު ދެކެ ވާ ލޯބި ފެނިގެން ގޮއްސި ކަމަށާއި ގައުމަށް ބޭނުންވާ ގައުމިއްޔަތަކީ އެއީ ކަމަށެވެ. މުއިއްޒު އެ ދައްކަވަމުން ގެންދަވަނީ އެއްވެސް ކަހަލަ ގައުމީ ލޯތްބެއް ނޫން ކަމަށް ޖަމީލް ސިފަކުރެއްވިއެވެ.

މީގެ އިތުރުން، ރައީސް މުއިއްޒަށް ކޯލިޝަން ޕާޓީގެ ކެންޑިޑޭޓަކަށް ވިޔަސް ތާއީދު ކުރެވުނީތީ ހިތާމަ ކުރާ ކަމަށް ޖަމީލްގެ ޕޯސްޓްގައި ފާހަގަކޮށްފައިވެއެވެ.

މި ވެރިކަމުގައި ރައީސް ޔާމީނަށް އިންސާފުވެރި ޝަރީއަތެއް ނުހިނގާނެ ކަމަށާއި އޭރުވެސް އަދި މިހާރުވެސް ރައީސް ޔާމީނަށް ކޮށްފައިވަނީ ސިޔާސީ ހުކުމެެއް ކަމަށް ވެސް ޑރ ޖަމީލް ވިދާޅުވިއެވެ.

މިއާއި އެކު 2028 ވަނަ އަހަރުގެ ރިޔާސީ އިންތިޚާބުގައި ވާދަކޮށް ރައްޔިތުންގެ ލޯތްބާއި އެކު ކާމިޔާބު ކުރައްވާނެ ކަމަށް ޑރ. ޖަމީލް ވިދާޅުވިއެވެ.