ނިމިދިޔަ ރިޔާސީ އިންތިހާބުގައި ރައީސް ޑރ. މުހައްމަދު މުއިއްޒަށް ތާއީދު ކުރެވުނީތީ ވަރަށް ބޮޑަށް ހިތާމަކުރައްވާ ކަމަށް ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.
ރާއްޖެ ޓީވީން މިއަދު ގެނެސްދިން "ފަށާއިރު" ޕްރޮގްރާމުގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ ރައީސް މުއިއްޒަކީ ޕީޕީއެމްގެ މުޑުވަކެއް ކަމަށާއި ނަމަވެސް ކަން އެކުރައްވަމުން ގެންދަވަނީ ޣައިރު ޒިންމާދާރު ގޮތެއްގައި ކަމަށެވެ.
" އެބްސޮލިއުޓްލީ، ވަރަށް ބޮޑަށް ރިގްރެޓްކުރަން، މުއިއްޒު އަކީ އަޅުގަނޑުމެންގެ މުޑުވަކެއް، އަޅުގަނޑުމެން ރައްޔިތުންނަށް ދެއްކި ބޭފުޅެއް. އެކަމަކު މިހާރު މުއިއްޒު ވެރިކަމަށް ވަޑައިގެން ނިންމަވާ ނިންމެވުންތަކުގެ ސަބަބުން ރައްޔިތުން ތަހައްމަލު ކުރަމުންދަނީ ވަރަށް ހިތްދަތި، ވަރަށް ދަތި ދުވަސްތަކެއް ." ރާއްޖެޓިވީގެ ފަށާއިރު ޕްރޮގްރާމްގެ ޕްރެސެންޓަރުގެ ސުވާލަށް ޖަވާބުދެއްވަމުން ވިދާޅުވި އެވެ.
ސަރުކާރު ޒިންމާދާރު ކުރެއްވުމުގައި މިހާރު ހަރަކާތްތެރިވެވަޑައިގަންނަވަމުން ގެންދަވާ ރައީސް ޔާމީން ވިދާޅުވީ ވެރިކަމާ ހަވާލުވެ ވަޑައިގެން މުއިއްޒު އަމަލު ކުރައްވާ ގޮތް ކަމު ނުދާ ކަމަށެވެ. އަދި ދޭސީކޮށް، ޣައިރު ޒިންމާދާރުކޮށް އަމަލުތައް ކުރާނެ ކަމާމެދު އުންމީދު ނުކުރައްވާ ކަމަށްވެސް ވިދާޅުވިއެވެ.
އިންޑިއާ ސިފައިން ރާއްޖޭން ބޭރުކޮށްފައިވާ ކަމަށް ރައީސް މުއިއްޒު ތަކުރާރުކޮށް ވިދާޅުވާ ވާހަކައަކީ ބުހުތާނު ދޮގެއް ކަމަށް ވެސް ރައީސް ޔާމީން ވިދާޅުވިއެވެ. އަދި ވިދާޅުވީ މުއިއްޒުގެ އަމަލުތަކުން ރާއްޖޭގެ މާލީ ހާލަތު އިތުރަށް ގޯސްވެފައިވާ ކަމަށެވެ. ރައީސް މުއިއްޒު ކަންކުރައްވާ ގޮތުން އެ މަނިކުފާނުގެ ތާއިދު ގެއްލިފައިވާ ކަމަށް ވެސް ޔާމީން ވިދާޅުވިއެވެ.
