ނިމިދިޔަ ރިާޔސީ އިންތިހާބުގައި އެތައް ބައެއްގެ ހައްގު ގެއްލޭ ގޮތަށް، ޕީޕީއެމްގެ ރިޔާސީ ކެންޑިޑޭޓު ރައީސް އަބްދުﷲ ޔާމީންގެ ރިޔާސީ ޓިކެޓު، ސުޕްރީމު ކޯޓު ތެރެއިން "ކަޓުވާލި" ފަނޑިޔާރުންގެ މައްސަލަ ބަލަން ޖެހޭ ކަމަށް ޕީޕަލްސް ނެޝަނަލް ފްރޮންޓް (ޕީއެންއެފް)ގެ ސެކެރެޓަރީ ޖެނެރަލް މުހައްމަދު މަލީހު ޖަމާލު ވިދާޅުވެއްޖެއެވެ.

މަލީހު މިފަދައިން ވިދާޅުވެފައިވަނީ އެކްސްގައި ކުރެއްވި ޕޯސްޓެއްގައެވެ.

މަލީހު ވިދާޅުވީ ޤާނޫނާއި ޚިލާފަށް ސިއްރު ޑީލެއްގެ ތެރެއިން ކޮރަޕްޓް ޕްރެކްޓިސް އެކުލެވޭ ގޮތަށް ޖުޑިޝަރީ ތެރެއިން ރައީސް ޔާމީންގެ ރިޔާސީ ޓިކެޓް ކަޓުވާލީ ކަމަށެވެ. އެހެންކަމުން އެކަން ހިންގި ކޮރަޕްޓް ފަނޑިޔާރުންގެ މައްސަލަ ބަލާ ފިޔަވަޅު އަޅަންޖެހޭކަމަށް ވެސް މަލީހުގެ ޕޯސްޓުގައި ފާހަގަކުރައްވާފައިވެއެވެ.

މީގެ އިތުރުން މަލީހު ވަނީ ރާއްޖޭގެ ފަނޑިޔާރުގެ އިސްލާހުވާން ކައިރިވެސް ނުވާކަމަށް ވިދާޅުވެ އަދިވެސް ގައުމުގައި އިންސާފަށް ވުރެ ގިނައީ ބޭއިންސާފުކަން ފާހަގަކުރައްވާ ރާއްޖޭގެ ޖުޑީޝިއަރީ އަށް ނުހަނު ބޮޑަށް ފާޑުވިދާޅުވެފައެވެ.

މަލީހު މިފަދައިން ވިދާޅުވެފައިވާއިރު، ރައީސް ޔާމީންގެ ރިޔާސީ ޓިކެޓުގެ މައްސަލަ އެމަނިކުފާނާ ދެކޮޅަށް ސުޕްރީމު ކޯޓުން ނިންމީ، އެމަނިކުފާނުގެ މައްޗަށް ހުކުމެއް އޮތްކަމަށް ބުނެއެވެ. އަދި އިސްތިއުނާފުގެ މަރުހަލާގައި މައްސަލަ އޮތްއިރު ރައީސް ޔާމީނަށް އިންތިހާބު ކާމިޔާބުކުރެއްވިޖެ ނަމަ ފަހުން އެ ހުކުމް ދަމަހައްޓަން ޖެހިއްޖެ ހާލަތެއްގައި ވެރިކަން ކުރާނީ ކާކުކަމާ މެދު ފަނޑިޔާރުން ސުވާލުއުފައްދަވާފައިވެއެވެ. ނަމަވެސް އޭގެ ފަހުން އިސްތިއުނާފު މަރުހަލާ ނިމިގެން ދިޔައީ އެމަނިކުފާނުގެ މައްޗަށް އިއްވި ހުކުމްގައި ހިމެނޭ މައްސަލަ އަލުން ބަލަންށެވެ. އެހެންކަމުން ސުޕްރީމު ކޯޓުން ނިންމި ނިންމުން ގޯސްވެ އެތައް ހައްގުތަކެއް ރައީސް ޔާމީންގެއާ އަދި ދިވެހި ރައްޔިތުންގެ ގެއްލިގެން ދިޔަކަން ޝަރުއީ ދާއިރާގެ ފުންނާބު އުސް ބޭފުޅުން ފާހަގަކުރައްވައެވެ. އަދި އެ ގެއްލުނު ހައްގުތަކުން ލިބުނު ގެއްލުން އިޔާދަ ކުރާނެ ގޮތަކާ މެދު ސުވާލު އުފައްދައެވެ.