ތޫނު ހަތިޔާރު ބޭނުންކޮށްގެން މާރާމާރީ ހިންގި ބަޔަކު ތަހްގީގު މަރުހަލާ ނިމެންދެން ބަންދު ކުރަން ކްރިމިނަލް ކޯޓުން އަމުރުކޮށްފިއެވެ.

މި މައްސަލައާ ގުޅިގެން ހައްޔަރުކޮށްފައިވަނީ 22 އަހަރުގެ ނ. މަނަދޫއަށް ނިސްބަތްވާ ފިރިހެނަކާއި، އއ. މާޅޮހަށް ނިސްބަތްވާ 23 އަހަރުގެ ފިރިހެނަކާއި، ގދ. ވާދޫއަށް ނިސްބަތްވާ 21 އަހަރުގެ ފިރިހެނެއްގެ އިތުރުން، މާލެއަށް ނިސްބަތްވާ 21 އަހަރުގެ ފިރިހެނެކެެވެ.

މި މީހުންނާއި ގުޅޭ ބަންދު އަމުރުގައި ބުނެފައި ވަނީ ތުހުމަތު ކުރެވޭ މިންވަރަށް ހެކި ހުށަހަޅާފައިވާ ކަމަށެވެ. އެގޮތުން ތަހުގީގު ބަޔާންތަކާއި، ސީސީޓީވީ ފޫޓޭޖްގެ ސްނެޕްޝޮޓްތަކާއި، އިންޓަލިޖެންސް ރިޕޯޓްގެ އިތުރުން، އެ ނޫންވެސް ހެކި ހުށަހަޅާފައިވާ ކަމަށް ބުނެފައި ވެއެވެ.

މި އެންމެންވެސް ތަހުގީގު މަރުހަލާ ނިމެންދެން ބަންދު ކުރީ މިދިޔަ ބުދަ ދުވަހެެވެ.

މި އެންމެންނަކީވެސް މި ނޫންވެސް ކުށްތަކުގެ ރެކޯޑް އޮންނަ މީހުންނެވެ. އަދި މި ހަތަރު މީހުންގެ ސީދާ ބައިވެރިވުންވެސް މިކަމުގައި އޮތްކަމަށް ބުނެފައިވާއިރު، ޖިސްމާނީ ގޮތުން އަނިޔާ ދީފައިވާ ކަމަށްވެސް ބުނެފައި ވެއެވެ.