ސައިބާ ހަމަލާތަކުން ރައްކާތެރިވުމުގެ ގާބިލުކަން ގައުމީ ފެންވަރުގައި ގާއިމުކުރަން ޖެހޭ ކަމަށް ހޯމްލޭންޑް މިނިސްޓަރު އަލީ އިހުސާން ވިދާޅުވެއްޖެއެވެ.

މިނިސްޓަރު މިހެން ވިދާޅުވީ ސައިބަރ އެކްސްޕޯ އިފްތިތާޙްކުރުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.

އިހުސާން ދެއްކެވި ވާހަކަފުޅުގައި، ރާއްޖޭގެ ސައިބާ ސްޕޭސްގެ ހާލަތު މިހާރު އޮތްގޮތް ވަޒަންކުރަންޖެހޭ ކަމަށް ވިދާޅުވިއެވެ. އެގޮތުން، މި ސަރުކާރާ ހަވާލުވެގެން އައި އިރު ސަރުކާރުގެ އެކި އިދާރާތަކަށް ސައިބާ ތްރެޓްސް އައި މިންވަރާއި އަމިއްލަ ވިޔަފާރިތަކަށް ދޭތެރެ ދޭތެރެއިން ތްރެޓްސް އަންނަވަރު މިހާރު ވެސް ވަޒަން ކުރަންޖެހޭ ކަމަށާއި ނެޝަނަލް ލެވެލްގައި މުޅި ސައިބާ ސްޕޭސް މެނޭޖުކުރަން ޖެހޭކަމަށް ވިދާޅުވިއެވެ.

އިހުސާން ވިދާޅުވީ މި ސަރުކާރު ވެރިކަމަށް އައި އިރު، ދައުލަތުގެ އެކި އިދާރާތަކާއި އަމިއްލަ ވިޔަފާރިތަކަށް ދޭތެރެ ދޭތެރެއިން ސައިބަ އެޓޭކްތައް ދެމުން އައި ކަމަށާއި މިހާރު ރާއްޖޭގެ ސައިބާ ސްޕޭސް އޮތް ގޮތް ދިވެހީން ވަޒަންކުރަން ޖެހޭ ކަމަށެވެ.

އެގޮތުން ތަފާސްހިސާބަށް ބަލާއިރު މިދިޔަ އަހަރާ އަޅައިބަލާ އިރު މި އަހަރު ސައިބާ ހަމަލާތައް 31 ޕަސެންޓް އިތުރުވެފައިވާ ކަމަށް ވެސް މިނިސްޓަރު ވިދާޅުވި އެވެ. އަދި އަންނަ އަހަރަށް ލަފާކުރާ ގޮތަށް ބަލާއިރު މީގެން ކޮންމެ ރެންސަމްވެއާ އެޓޭކެއްގެ އެވްރެޖް ވެލިއުއަކީ 200،000 ޑޮލަރު ކަމަށް ވިދާޅުވިއެވެ.

އެ ރަސްމިއްޔާތުގައި، ކޮމިޝަނާ އޮފް ޕޮލިސް އަލީ ޝުޖާއު، ޑެޕިއުޓީ ކޮމިޝަނާ އޮފް ޕޮލިސް އިސްމާއީލް ނަވީން، ޗީފް އޮފް ޑިފެންސް ފޯސް މޭޖާ ޖެނެރަލް އިބްރާހީމް ހިލްމީ، ފުލުހުންގެ އެގްޒެކެޓިވް ބައެއް އޮފިސަރުން އަދި އެހެނިހެން ބައެއް މުއައްސަސާތަކާއި ކުންފުނިތަކުގެ އިސްވެރިންނާއި ދައުވަތު އެރުވިގެން ވަޑައިގެންނެވި އެހެނިހެން ބޭފުޅުންނާއި ފުލުހުން ބައިވެރިވެވަޑައިގަތެވެ.