ތުރުކީން ސަހްޔޫނީންނާއެކު އެއްވެސް ގުޅުމެއް ކުރިއަށް އޮތް ތަނުގައި ނުބާއްވާނެ ކަމަށް ތުރުކީގެ ރައީސް އުރުދުޣާން ވިދާޅުވެއްޖެ އެވެ.

ސައުދީއަށް ކުރެއްވި ދަތުރަކަށް ފަހު އެނބުރި ގައުމަށް ވަޑައިގަތް މަގުމަތީގައި ނޫސްވެރިންނަށް ދެއްވި އިންޓަވިއުއެއްގައި އުރުދުޣާން ވިދާޅުވީ ސަހްޔޫނީންނާ އެކު އިގުތިސާދީ ގުޅުންތައް ވެސް އޮންނާނީ ކަނޑާލާފައި ކަމަށެވެ.

އުރުދުޣާން ވިދާޅުވި ގޮތުގައި މިއީ ސަރުކާރު ހިންގާ ކޯލިޝަނުގެ ހުރިހާ ޕާޓީތައް އެއްބަސްވެގެން ނިންމާފައިވާ ނިންމުމެކެވެ. އަދި އެ ނިންމުން ކުރިއަށް އޮތް ތަނުގައިވެސް ކޯލިޝަން ސަރުކާރުން ދަމަހައްޓާނެ ކަމުގެ ޔަގީންކަން އޭނާ ދެއްވި އެވެ.

މޭ މަހުން ފެށިގެން އިސްރާއީލާއެކު ވިޔަފާރިކުރުން ތުރުކީން ހުއްޓައިލި ނަމަވެސް އެ ގައުމާއި އިސްރާއީލާ ދެމެދުގައި ޑިޕްލޮމެޓިކް ގުޅުންތައް އެކި ފެންވަރުގައި ދަމަހައްޓަމުން އައިސްފައިވެ އެވެ.

ތެލްއަވީވުން އެ ހިންގަނީ ބޮޑު ގަތުލު އާންމެއް ކަމަށްވެސް އުރުދުޣާން ވިދާޅުވި އެވެ. އެއީ ނަސްލުން ނައްތާލުން ފިޔަވައި އިތުރު އެހެން ކަމެއް ނޫން ކަމަށްވެސް އޭނާ ވިދާޅުވި އެވެ.

ނަސްލު ނައްތާލުމުގެ ކުށަށް ނެތަންޔާހޫ ޖަވާބުދާރީ ކުރުވުމަށް ކުރެއްވެން ހުރި ހުރިހާ ކަމެއް ކުރައްވާނެކަމަށް އުރުދުޣާން ވައުދުވެވަޑައިގަތެވެ.

ސަހްޔޫނީންނަށް ހަތިޔާރު ޝިޕްމަންޓުތައް ފޮނުވަމުންދާތީ ކަންބޮޑުވުން ފާޅުކުރައްވަމުން އުރުދުޣާން ވިދާޅުވީ، ހަތިޔާރު ފޮނުވުން ކުރިއަށް ދާހާ ހިނދަކު، އިޒްރޭލު އިތުރަށް އަނިޔާވެރިވާނެ، އިޒްރޭލު ނުހުއްޓުވޭ ނަމަ ހަމަ ކޮންމެ ދުވަހަކު، ފަލަސްޠީނާއި ލުބުނާންގެ ހާލަތު ގޯސްވަމުންދާނެ ކަމަށެވެ.

މިފަދައިން އުރުދުޣާން ވިދާޅުވި ނަމަވެސް އެހެނިހެން ގައުމުތައް މެދުވެރިކޮށް ތުރުކީ ކުންފުނިތަކުން އިސްރާއީލާއެކު ވިޔަފާރިކުރަމުންދާ މައްސަލަ ފެންމަތިވެ، ގިނަ ބަޔަކު ދަނީ އުރުދުޣާނުގެ ސަރުކާރަށް އެ މައްސަލާގައި އެކަށީގެންވާ ފިޔަވަޅުތަކެއް ނޭޅުއްވޭކަމަށް ބުނެ ފާޑުކިޔަމުންނެވެ.