"ބުނި ބަސް" ސެގްމެންޓްގައި މިއަދު މިބަލާލަނީ 11 އެޕްރީލް 2021 ވަނަ ދުވަހު ރޭ ޑރ. މުއިއްޒު ދެއްކެވި ވާހަކަފުޅަކަށެވެ.

މި ހުރިހާ ދުވަހު އެމްޑީޕީން ރަސްކުރަމުން ދިޔަ މާލޭ ސިޓީ ކައުންސިލްގެ މައްޗަށް ޕީޕީއެމުން ބާރު ހޯދީ، ދީނާއި ތަރައްގީގެ ފިކުރު އިސްކޮށްގެން ކަމަށާއި އެއީ ޕާޓީގެ ލީޑަރު ކުރީގެ ރައީސް އަބްދުﷲ ޔާމީންގެ ފިކުރު ކަމަށް، މޭޔަރަކަށް އިންތިހާބުވި ޑރ. މުހައްމަދު މުއިއްޒު އެދުވަހު ވިދާޅުވިއެވެ.

10 އެޕްރީލް 2021 ގައި އޮތް ލޯކަލް ކައުންސިލް އިންތިހާބުގައި މާލޭގެ މޭޔަރުކަމާއި ސިޓީ ކައުންސިލްގެ ގިނަ ގޮނޑިތަކެއް ކާމިޔާބުކޮށްގެން، ރައީސް ޔާމީންގެ ލީޑަރޝިޕްގައި ޕީޕީއެމް ވަނީ އެފަހަރު މުޅި ރާއްޖެ ސިއްސުވާލައިފައެވެ.

މިކަމުގެ އުފަލުގައި ބޭއްވި "މީ މަގޭ ރާއްޖެ އަލިވިލުން" ހަފުލާގައި ވާހަކަ ދައްކަވަމުން، މުއިއްޒު ވިދާޅުވި ގޮތުގައި އޭނާ އިންތިހާބަށް ނުކުންނެވީ، ރައީސް ޔާމީން ދަސްކޮށްދެއްވި ފިކުރުގައެވެ. އެއީ ދީނީ ފިކުރާއި ތަރައްގީގެ ފިކުރެވެ. އިންތިހާބު ކާމިޔާބު ކުރެވުމުގެ އަނެއް ސަބަބެއް ކަމަށް މުއިއްޒު ފާހަގަކުރެއްވީ މި ސަރުކާރުގެ ދެ އަހަރާއި ބައިގެ ތެރޭގައި، މާލޭގެ ރައްޔިތުންނަށް ވެފައިވާ ވައުދުތައް ނުފުއްދުމެވެ.

ކެމްޕޭންގެ ތެރޭގައި އޭނާ ވަނީ، މާލޭގެ ވަރަށް ގިނަ ގެތަކަށް ވަޑައިގެން، އާއްމުންނާ ބައްދަލުކުުރައްވައިފަ އެވެ. މުއިއްޒު ވިދާޅުވި ގޮތުގައި މާލޭގެ ގިނަ މީހުންގެ މޫނުމަތިން ފެނުނީ މާޔޫސް ކަމާއި ހިތްދަތިކަމެވެ. ބޯހިޔާވަހިކަން ދޭނެ ކަމަށް ސަރުކާރުން ވި ވައުދު ނުފުއްދުމުގެ ސަބަބުން، ގިނަ ބަޔަކު އުޅެނީ ވަރަށް ހާލުގައި ކަމަށް ވިދާޅުވިއެވެ.

އެ މީހުންގެ މައިގަނޑު ޝަކުވާ އަކަށްވީ، މުއިއްޒުގެ ބަހުން ނަމަ، ރައީސް ޔާމީންގެ ސަރުކާރުން ދިން ފްލެޓްތައް އަތުލުމާއި ވިޔަފާރިތައް ބަނގުރޫޓުވުމެވެ.

އޭނާ ވިދާޅުވި ގޮތުގައި ޕީޕީއެމަށް ދިވެހި ރައްޔިތުން ވޯޓު ދިނީ، ގައުމީ ވިސްނުމުގަ އެވެ. އިސްލާމް ދީނާއި ގައުމިއްޔަތާ މެދު އެ މީހުން ކަންބޮޑުވުމެވެ. އެހެންވެ، އެ ހުރިހާ ކަމަކުން އުއްމީދު ލިބިވަޑައިގަންނަވާ ކަމަށާއި ދީނާއި ގައުމަށް ގައްދާރުވާ، މިނިވަންކަން ގެއްލޭ ގޮތަށް އަމަލުކުރާ މީހުންނަށް ފުރުސަތު ނުދޭނެ ކަން އެނގިވަޑައިގެންނެވި ކަމަށް މުއިއްޒު ވިދާޅުވިއެވެ.

އެ ހަފްލާގައި މުއިއްޒު ވިދާޅުވީ ވައުދަކީ،ރައީސް ޔާމީން ފަދައިން އަމާނަތްތެރިކަމާއި ތެދުވެރިކަމާއެކު، މާލޭ ރައްޔިތުންގެ ބޭނުންތައް ފުއްދައިދިނުން ކަމަށެވެ. އަދި ރައީސް ޔާމީންގެ އެދި ލެއްވުމަކީ އެއީ ކަމަށް މުއިއްޒު އެދުވަހު ވިދާޅުވި އެވެ.

ނަމަވެސް މޭޔަރުކަމާއި ރާއްޖޭގެ ވެރިކަން ރައީސް ޔާމީންގެ "ހިޔަނީގައި" ކާމިޔާބު ކުރެއްވުމަށްފަހު މިއަދު މުއިއްޒު ރައީސް ޔާމީންއަށް އެ ދެއްވަނީ "ފެނު ކައްކާ ބޮލީގެ އިއްޒަތެވެ"