ޕާސްޕޯޓާއި އައިޑީ ކާޑުގެ ހިދުމަތް މުޅި ރާއްޖެއަށް ފުޅާ ކުރުމުގެ މަޝްރޫއު މިއަދު ސަރުކާރުން އިފްތިތާހުކޮށްފި އެވެ.

ހޯމް މިނިސްޓަރު އަލީ އިހުސާން ވިދާޅުވީ މިމަޝްރޫއު ފެށުމާއެކު މިއަދަކީ ދިވެހި ތާރީހުގައި ރަން އަކުރުން ފަވާލެވޭނެ ދުވަހެއް ކަމަށެވެ.

އިހުސާން ވިދާޅުވީ އަތޮޅުގެ ވެރިކަން ކުރާ ރަށުގެ އިތުރުން ހަތް ރަށެއްގައި ޕާސްޕޯޓާއި އައިޑީކާޑުގެ ހިދުމަތް ދިނުމަށް ނިންމާފައިވާ ކަމަށާއި އެގޮތަށް ނިންމީ ވެރިކަން ކުރާ ރަށާއި ދުރުގައި ބައެއް ރަށްތައް އޮންނާތީ ކަމަށެވެ.

ހޯމްލޭންޑް ސެކިއުރިޓީ މިނިސްޓްރީ އުފައްދާފައި އޮތީ ދައުލަތުގެ މައުލޫމާތު ބެލެހެއްޓޭނެ ގޮތަށް ކަމަށްވުމުން އައިޑީކާޑާއި ޕާސްޕޯޓުގެ ހިދުމަތް ރަށްރަށަށް ފުޅާ ކުރަން ފަސޭހަވި ކަމަށް މިނިސްޓަރު ފާހަގަކުރެއްވި އެވެ.

މިނިސްޓަރު އިހުސާން ވިދާޅުވީ އައިޑީކާޑުގެ ހިދުމަތުގެ ތެރެއިން އަތޮޅުތަކަށް ފުރުސަތުދީފައިވަނީ އައިޑީކާޑު ޕްރިންޓް ކުރުމަށް އެކަނި ކަމަށެވެ. އެހެންކަމުން މައުލޫމާތު ރައްކާތެރިވެގެންދާނެކަމަށް ވިދާޅުވި އެވެ.

މާލެ ފިޔަވާ މިހާރު އައީޑީ ކާޑު ހަދާދިނުމުގެ ހިދުމަތް ފަށާފައިވަނީ ހުޅުމާލޭގެ ފޭސް އެކަކާއި ދޭއްގެ އިތުރުން ވިލިމާލެ އާއި ހދ. ކުޅުދުއްފުށީގަ އެވެ. ޕާސްޕޯޓް ހަދާދިނުމުގެ ހިދުމަތް ފަށާފައިވަނީ ހުޅުމާލޭ ފޭސް އެކަކާއި ފޭސް ދޭއްގެ އިތުރުން ވިލިމާލެ އާއި ލ. ފޮނަދޫ އަދި ދ. ކުޑަހުވަދޫގަ އެވެ.

ކައުންސިލްތަކާ ގުޅިގެން އައިޑީ ކާޑު ޔުނިޓް ނުވަތަ ޑީއެންއާރުގެ މަސައްކަތްތައް ބައްޓަން ކުރުމުގެ ގޮތުން ޚާއްސަ ޕޯޓަލް "ނާރެސް" މިދިޔަ ޖުލައި މަހު ވަނީ އިފްތިތާހުކޮށްފަ އެވެ. ނާރެސް މެދުވެރިކޮށް ކައުންސިލްތަކަށް އައިޑީކާޑްގެ ސްޓޭޓަސް ބެލުމާއި މާލެއެކޭ އެއްފަދައިން އައިޑީ ކާޑް ދޫކުރުން އަދި އެޕްލިކޭޝަންތައް ބަލައިގަތުމަށް ހިދުމަތް ލިބިގެންދާނެ އެވެ.