މެލޭޝިއާއިން ސަހްޔޫނީންނާއެކު އެއްވެސް ގުޅުމެއް ނުބާއްވާނެ ކަމަށް އެ ގައުމުގެ ބޮޑުވަޒީރު އަންވަރު އިބްރާހިމް ވިދާޅުވެއްޖެ އެވެ.

އޭޕެކް ސަމިޓުގައި އަންވަރު ވިދާޅުވީ ސަހްޔޫނީންނަކީ އދގެ މެމްބަރު ގައުމެއް ނަމަވެސް އެ ގައުމު ރަސްމީކޮށް ބަލައިގަތުމަށް މެލޭޝިއާއިން ދެކޮޅު ހަދާނެ ކަމަށެވެ.

ސަހްޔޫނީންނާން ގާޒާއަށް ދެމުންގެންދާ ހަމަލާތަކުގައި މިހާތަނަށް 43،700 އަށްވުރެ ގިނަ މީހުން ޝަހީދުކޮށްލާފައިވާއިރު، އެތައް ބަޔަކު ވަނީ ޒަހަމްކޮށްލާފަ އެވެ. އޭގެ ތެރޭގައި 70 އިންސައްތަ މީހުންނަކީ އަންހެނުންނާއި ކުޑަކުދިން ކަމަށް ވެސް އދ ން ވަނީ ހާމަކޮށްފަ އެވެ. ގާޒާއި ފަލަސްތީނުގެ އެހެން ސަރަހައްދުތައް ސުންނާފަތިކުރުމަށް ފަހު، ސަހްޔޫނީން މިހާރު ހަމަލާތަކުގެ އަމާޒަކީ ލުބުނާނެވެ.

އޭޕެކް ސަމިޓުގައި ނޫސްވެރިންނާ ބައްދަލުކުރައްވާ އަންވަރު އިތުރަށް ވިދާޅުވީ އޭޕެކް ސަމިޓުގައި ފަލަސްތީނާ ދެކޮޅަށް ސަހްޔޫނީން ހިންގާ ހަމަނުޖެހުންތަކާ މެދު އަޑުއުފުލި ހަމައެކަނި ގައުމަކީވެސް މެލޭޝިއާ ކަމަށެވެ.

އެއީ އަދުލު އިންސާފުގެ މައްސަލައެއްކަން ފާހަގަކުރައްވައި، ފަލަސްތީނުގެ ރައްޔިތުންގެ ހައްގުތަކަށް މެލޭޝިއާއިން އަބަދުވެސް އަޑުއުފުލާނެކަން އަންވަރު ބަޔާންކުރެއްވި އެވެ.