ރައްޔިތުންގެ މަޖިލީހުގެ ސުޕަރ މެޖޯރިޓީގެ ބޭނުން ނަހަމަ ގޮތުގައި ހިފާނެކަމުގެ އިޝާރާތެއް ރައީސް ޑރ މުހައްމަދު މުއިއްޒު ކުރައްވައިފިއެވެ.

އެމަނިކުފާނު އެފަދަ އިޝާރާތެއް ކުރެއްވީ، ވެރިކަމަށް އަހަރެއް ފުރުން ފާހަގަ ކުރުމަށްޓަކައި ރޭ ޒުވާނުންގެ މަރުކަޒުގައި ބޭއްވި ޖަލްސާގައި ވާހަކަފުޅު ދައްކަވަމުންނެވެ.

އެގޮތުން ރައީސް މުއިއްޒު ވަނީ، ގާނޫނު ބަދަލުކޮށްގެން ވިޔަސް، ނުވަތަ ކޮންމެ ކަމެއް ކޮށްގެން ވިޔަސް އެމަނިކުފާނު ވެރިކަމުގައި ވަޑައިގަންނަވަން ބޭނުންފުޅުވާ ހިސާބަކަށް ވަޑައިގަތުމަށް ކުރައްވަން ޖެހުނު ކޮންމެ ކަމެއް ކުރައްވާނެ ކަމަށް ވިދާޅުވެފައެވެ.

ރައީސް މުއިއްޒު މިފަދައިން ވިދާޅުވެފައި މިވަނީ މިނިވަން މުއައްސަސާތަކުގެ ބާރުތައްވެސް އެމަނިކުފާނުގެ އަތްޕުޅަށް ނެގޭ ގޮތަށާ އަދި އެމަނިކުފާނަށާ ސަރުކާރަށް ފާޑުކިޔާ ނޫސްތަކާ ނޫސްވެރިންނާ މެދު ފިޔަވަޅު އަޅަންވެސް، ސަރުކާރުގެ މެޖޯރިޓީ އޮތް މަޖިލީހަށް ހުށަހަޅައިގެން އުޅޭ ދަޑިވަޅެއްގައި ފާހަގަކޮށްލެވެއެވެ.