ތިމަންމަނިކުފާނު ހުންނެވީ ބައްޕާފުޅު ދެއްކެވި މަގުން ރައްޔިތުންގެ ހައްގުތައް ކަށަވަރުކުރަން ކަމަށް ރައީސް މުހައްމަދު މުއިއްޒު ވިދާޅުވެފައިވަނިކޮށް، އެމަނިކުފާނުގެ ދޮންމަންމާފުޅުގެ ވަރުގަދަ ނަސޭހަތުގެ ބަސްކޮޅެއް މީސްމީޑިޔާއަށް ދޫކޮށްލައްވައިފިއެވެ.

ރައީސް މުއިއްޒު އެމަނިކުފާނުގެ ދޮންމަންމާފުޅާ މެދު އިހާނެތިކޮށް ކަންކަންކޮށްފައިވާ ކަމަށާ އަދި މިހާރުވެސް އެކަމަނާގެ ހައްގުތައް ކަށަވަރުކޮށް ނުދެއްވާކަމުގެ އަޑުތައް ގަދަވެފައި ވަނިކޮށް ޖީ ސްކީލާންގެ ވީޑިއޯއެއް ވަނީ މީސްމީޑިޔާގައި އަނެއްކާވެސް ތިލަވެފައެވެ.

މީގެ ކުރިން ރާއްޖޭގެ އޮންލައިން ނޫހަކުން ޖީ ސްކީލާންގެ އިންޓަރވިއުއަކާ އެއްކޮށް ގެނެސްދިން ރިޕޯޓަކަށް އެވޯޑް ލިބުނު މައްސަލައެއް ބޮޑުވެ ގައުމީ ފެންވަރުގައި ބަލަމުންދަނިކޮށް ޕީއެންއެފްގެ ކުރި ސަފުގައި ހަރަޖާތްތެރިވާ މުހައްމަދު އަހުމަދު ވަހީދު އޭނާގެ ސޯޝަލް މީޑިޔާގައި ހިއްސާކުރި އެ ވީޑިއޯގައި ފެނިގެން ދަނީ ރައީށް މުއިއްޒުގެ ދޮންމަންމާފުޅު އެމަނިކުފާނު ރާއްޖޭގެ މީޑިޔާތަކަށް އެކަމާ ގުޅިގެން ދެއްވި އިންޓަރވިއުގައި ދެއްކެވި ގިނަ ވާހަކަފުޅުތައް ދޮގުކުރަމުން ދިޔަ މަންޒަރެވެ.

އެގޮތުން ޖީ ސްކީލާން ހުސެއިން ވިދާޅުވާ ގޮތުގައި ރައީސް މުއިއްޒުގެ މަރްހޫމު ބައްޕާފުޅު އަވަހާރަވީއިރު އެއްވެސް ބިމެއް އަދި ގޯއްޗެއްވެސް އަދި ގެސްޓު ހައުސް އެއް ވެސް ނެތް ކަމަށާ ނަމަވެސް ރައީސް މުއިއްޒުގެ ބައްޕާފުުޅު ޖީ ސްކީލާންގެ ނަމުގައި ގަތް ގެއެއް ހުރި ކަމަށެވެ.

ނަމަވެސް އޭނާ އިއްދައިގެ ދުވަސްވަރު ރާއްޖެ ކޯތަށް ގަދަކަމުން ރައީސް މުއިއްޒު ހާޒިރުކުރުވުމުން، ރާއްޖެ އައިސް ހުއްޓާ އެގެެއަށް ވަގުން ވަދެ ގެ ލޭޓުވާލި ކަމަށާ ފަހުން ރައީސް މުއިއްޒު އެ ގެ މަރާމާތުކޮށްދިނުމުން ގެ ވިއްކާލީ އެ ގޭގައި ދިރިއުޅެން ބިރުން ކަމަށް ވެސް އޭނާ ކިޔާދިފައިވެއެވެ.

އެއަށް ފަހު ކުޑަ ގެއެއް ގަނެ އެ ގެއަށް އޭނާ ބަދަލުވެ މިހާރު އާމްދަނީ ހޯދަން ކުރާ މަސައްކަތަކީ ޓެކްސްޓައިލް ފިހާރައެއް ކަމަށް ވެސް ސްކީލާން ކިޔާދިފައިވެއެވެ. އަދި ކުރިން އިންޓަވިއުގައިވެސް އޭނާ ހާމަކުރި ގޮތަށް މި އިންޓަރވިއުގައި ވެސް އޭނާ ވަނި އޭނާއަށް ލިބުނު ހަލާލުބައި ދިނުމުން ފައިސާދޭން ރައީސް މުއިއްޒު ކޯޓުގައި އެއްބަސްވިކަން ފާހަގަކޮށްފައެވެ.

ނަމަވެސް އެ ވާހަކައާ އެއްގޮތަށް ރައީސް މުއިއްޒު އަމަލުނުކުރާ ކަމަށް ވެސް ސްކީލާން ވަނީ ހާމަކޮށްފައެވެ. މީގެ އިތުރުން އޭނާގެ ވާހަކަ ނިންމާލަމުން ސްކީލާން ވަނީ ދޮންދަރިފުޅު، މުއިއްޒަށް ނަސޭހަތެއް ދެއްވާފައެވެ. އެގޮތުން ސްކީލާން ވަނީ ﷲއަށް ބިރުވެތިވުމަށް ރައީސް މުއިއްޒަށް ގޮވާލާފައެވެ.

މީގެ އިތުރުން ވެސް ސްކީލާން ވަނީ މަކަރާ ހީލަތް ނުހަދާ ރައްޔިތުންނަށް ވެރިކަންކޮށްދިނުމަށް ރައީސް މުއިއްޒަށް ނަސޭހަތްތެރިވެފައެވެ.