ސަހްޔޫނީންގެ ބޮޑުވަޒީރު ބެންޖަމިން ނަތަންޔާހޫ އާއި އޭނާގެ ކުރީގެ ދިފާއީ ވަޒީރު ޔޯއަވް ގަލަންޓް ހައްޔަރު ކުރުމަށް ބައިނަލްއަގުވާމީ ޖިނާއީ ކޯޓް، އިންޓަރނޭޝަނަލް ކްރިމިނަލް ކޯޓު (އައިސީސީ)ން ނެރުނު އަމުރު އިޓަލީ ސަރުކާރުން ތަންފީޒު ކުރާނެ ކަމަށް އިޓަލީގެ ދިފާއީ ވަޒީރު ގުއީޑޯ ކްރޮސެޓޯ ވިދާޅުވެއްޖެ އެވެ.

އެ ކޯޓުގެ އިސް ޕްރޮސިކިޔުޓާ ކަރީމް ހާންގެ އޮފީހުން ސަހްޔޫނީންގެ ވެރިން ހައްޔަރުކުރުމުގެ އަމުރަކަށް އެދިފައި ވަނީ މިދިޔަ މޭ މަހު އެވެ.

އައިސީސީން އިއްޔެ ނެރުނު ބަޔާނެއްގައި ބުނި ގޮތުގައި ސަހްޔޫނީން ހައްޔަރުކުރުމުގެ އަމުރު ނެރުނީ ސަހުޔޫނީން މިހާރު ގާޒާގައި ކުރާ ހަނގުރާމައިގެ ތެރޭ ހިންގަމުންދާ ޖަރީމާތަކާއި އިންސާނިއްޔަތާ ހިލާފު ކަންތައްތަކުގެ ޖިނާއީ ޒިންމާ އެ ބޭފުޅުން އުފުލަން ޖެހޭ ކަމަށް ފަނޑިޔާރުންނަށް ގަބޫލުކުރެވޭނެ "އެކަށީގެންވާ ސަބަބުތަކެއް" ހުރުމުން ކަމަށެވެ.

އެގޮތުން ހަނގުރާމައިގެ އުކުޅެއްގެ ގޮތުގައި ބަޑުހައި ހޫނުކަން ބޭނުން ކުރުމާއި އާންމުންނަށް އަމާޒުކޮށް ގަސްތުގައި ހަމަލާދީ އެ މީހުން މަރާލައި ދަރިފަސްކޮޅެއް ނައްތާލުގެ ޖަރީމާތައް ހިންގާ ކަމުގެ ޒިންމާ ނަތަންޔާހޫ އުފުލަން ޖެހޭ ކަމަށް ފަނޑިޔާރުންނަށް ގަބޫލުކުރެއްވޭ ކަމަށް ބަޔާނުގައިވެ އެވެ.

އައިސީސީގެ އަމުރުތައް ތަންފީޒުކުރުން އެ ކޯޓްގެ މެންބަރުންގެ ގޮތުގައި ތިބި 124 ގައުމުގެ މައްޗަށް ލާޒިމްވާނެ އެވެ. ސަހްޔޫނީންނަށް އެންމެ ބޮޑަށް ވާގިވެރިވާ އެމެރިކާ އަކީ އެ ކޯޓުގެ މެންބަރު ގައުމެއް ނޫނެވެ.

އިޓަލީގެ އާރްއޭއައި ޓީވީއަށް ދެއްވި އިންޓަވިއުއެއްގައި އިޓަލީގެ ދިފާއީ ވަޒީރު ވިދާޅުވީ, އައިސީސީގެ ނިންމުމާއިއެކު، ބައިނަލްއަގުވާމީ ގާނޫނުތަކުގެ ދަށުން ނަތަންޔާހޫއާއި އޭނާގެ ކުރީގެ ދިފާއީ ވަޒީރު ޔޮއާވް ގަލަންޓް އިޓަލީއަށް ޒިޔާރަތްކުރައްވައިފިނަމަ އެ މީހުން ހައްޔަރުކުރަން ޖެހޭނެ ކަމަށެވެ.

ހަނގުރާމައިގެ ޖަރީމާތަކާއި އިންސާނިއްޔަތާ ދެކޮޅަށް ހިންގާ ޖަރީމާތަކާއި ނަސްލު ނައްތާލުމުގެ ތުހުމަތުތަކުގައި ވަކިވަކި ފަރުދުންގެ ޝަރީއަތް ހިންގާ އައިސީސީގައި ކުރިއަށްދާ ތަހުގީގަކީ ހޭގްގައި ވެސް ހުންނަ އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) ގައި ސަހްޔޫނީންނާއި ދެކޮޅަށް ފެށި ނަސްލު ނައްތާލުމުގެ މައްސަލައާ ވަކި ތަހުގީގެކެވެ.

ދުނިޔޭގެ ކޯޓުގެ ގޮތުގައި ބަލަމުން އަންނަ އައިސީޖޭ އަކީ ދައުލަތްތަކުގެ މެދުގައި އުފެދޭ މައްސަލަތައް ބެލުމަށް އދ. އިން ގާއިމުކޮށްފައިވާ ކޯޓެކެވެ.

ނަތަންޔާހޫގެ އިރުޝާދުގެ ދަށުން ސަހްޔޫނީން ގާޒާއަށް ދެމުންގެންދާ ލާއިންސާނީ ހަމަލާތަކުގައި މިހާތަނަށް ވަނީ 44،086 މީހުން ޝަހީދުކޮށްލާފަ އެވެ. ހަމަލާތަކުގައި ޒަހަމުކޮށްލާފައިވާ މީހުންގެ އަދަދު ވަނީ 104286 އަށް އުފުލިފަ އެވެ.