ދިވެހިރާއްޖޭގައި އޮތް އެންމެ ޑިމޮކްރެޓިކު ޕާޓީ ކަމަށް މިފަހަކަށް އައިސް ދައުވާ ކުރަމުން ދާ ޕީއެންސީގެ އެތެރޭގެ އިންތިޚާބުގައި ވޯޓާސް ލިސްޓު އޮޅުވާލި މައްސަލައެއް ފެންމަތިވެއްޖެއެވެ

އެގޮތުން އިއްޔެ ކުރިއަށްދިޔަ ވެރިކަން ކުރާ ޕީއެންސީ އެތެރޭގެ އިންތިހާބުގައި ވެލިދޫ ދާއިރާގެ ވޯޓާސް ލިސްޓު އޮޅުވާލިލާފައިވާ ކަމަށް ލިޔެކިޔުމުން ފެންނަން އޮތުމުން، އެ ދާއިރާގެ ރައީސް ކަމަށް ވާދަކުރެއްވި ޖަނާހު މުސްތަފާ ވަނީ އެ މައްސަލަ ހުށަހަޅާފައެވެ.

ޖަނާހު އޭނާގެ ފޭސްބުކް ޕޭޖުން ކުރި ޕޯސްޓެއްގައި ވަނީ ވޯޓާސް ލިސްޓަށް ގެނެސްފައިވާ ބަދަލަކީ ނަތީޖާ ބަދަލުވެދާނެ ފަދަ މައްސަލައެއްކަން ފާހަގަކޮށް އޭނާގެ ޓީމުން މިހާރު އެ މައްސަލަ ޕާޓީގެ އިދާރާއަށް ހުށަހަޅާފައިވާ ކަމަށެވެ.

ނ. ވެލިދޫގައި ބެހެއްޓި ވޯޓު ފޮށީގައި ބޭނުން ކުރި ވޯޓާސް ލިސްޓުގައި، ރަސްމީކޮށް ޕާޓީގެ އިދާރާއިން، ޕާޓީގެ ވެބްސައިޓްގައި ޝާއިއުކޮށްފަވާ ލިސްޓާއި އަޅާކިޔާއިރު 31 ފަރާތެއް ވަނީ އިތުރުކޮށްފައިވާކަން ފާހަގަވެފައޮވާކަމަށް ޖަނާހު ލިޔެ ފައިވެއެވެ.

މިކަން މިހެން އޮތުމުން ބޭއްވި އިންތިހާބުގެ ނަތީޖާ ގަބޫލުކުރަން އޭނާއާ އޭނާގެ ޓީމުން އިއުތިރާޒު ކުރާ ކަމަށް ޖަނާހު ވަނީ ޕޯސްޓުގައި ހާމަކޮށްފައެވެ.

މިފަދަ މައްސަލަ އެއް ފެންމަތިވެފައިވާއިރު، ވޯޓުލުން ކުރިއަށް ދަނިކޮށް ތ. ކަނޑޫދޫ ދާއިރާއަށް ވާދަކުރި ދެ ކެންޑިޑޭޓުންގެ މެދުގައި ހަމަނުޖެހުން ހިންގައި ވޯޓު ފޮށި ފަޅާލައިގެން ވޯޓު ކަރުދާސްތައް ގެއަށް ގެންދިޔަ މައްސަލައެއްވެސް ފެންމަތިވިއެވެ. އެކަން ވެސް ހިނގީ ވޯޓާސް ލިސްޓުގައި ދިމާވި މައްސަލައަކާ ގުޅިގެން ކަމަށް މައުލޫމާތު ލިބިފައިވެއެވެ.