ލުބުނާނުގެ ހިޒްބުﷲ އަށް ސަހްޔޫނީން ދެމުން ދިޔަ ހަމަލާތައް ހުއްޓާލައި ހަމާސް އަށް ކުރާ ޕްރެޝަރު ވަރުގަދަކުރާނެކަން ސަހްޔޫނީންގެ ބޮޑުވަޒީރު ބެންޖަމިން ނަތަންޔާހޫ އިއުލާނުކޮށްފި އެވެ.

ލުބްނާން އުދުވާން ހުއްޓުވުމަށް އެއްބަސްވުމެއް ހުށަހަޅައި، އެ ކަމަށް ދެ ފަރާތުގެ ތާޢީދު ހޯދަން މަސައްކަތް ކޮށްފައި ވަނީ ސަހްޔޫނީންގެ އެންމެ ބޮޑު މަދަދުގާރު، އެމެރިކާއާއި ފަރަންސޭސިވިލާތް ގުޅިގެންނެވެ.

ސަހްޔޫނީން އަސްކަރީ ގޮތުން އެހެން ހުރިހާ ގޮތަކުން ވެސް މަދަދު ދީ ހިމާޔަތްކުރަމުން އަންނަ އެމެރިކާގެ ރައީސް ބައިޑެން ވިދާޅުވީ މިއީ ހޯދުނު ބޮޑު ކުރިއެރުމެއް ކަމަށާއި މިއީ ސަރަހައްދުގައި ހަމަޖެހުން ގާއިމުކުރުމުގެ ފެށުމެއް ކަމަށެވެ.

ކެބިނެޓުން މި ނިންމުން ފާސްކުރުމުގެ ކުރިން ނަތަންޔާހޫ ވަނީ އެކަމާ ބެހޭ ގޮތުން ވާހަކަ ދައްކައިފަ އެވެ. އޭނާ ބުނީ ލުބްނާނަށް ހަމަލާ ދިނުން ހުއްޓާލުމާ އެކު ފަލަސްތީނުގެ ހަމާސް އަށް ދޭ ހަމަލާތައް ވަރުގަދަކުރާނެ ކަމަށެވެ.

ސަހްޔޫނީންގެ ހަމަލާތަކުގެ ސަބަބުން ލުބްނާން އެތައް ހާސް ބަޔަކު ވަނީ ގެދޮރު ދޫކޮށް ރައްކާތެރި ތަންތަނަށް ބަދަލުވެފަ އެވެ. ސަހްޔޫނީން އިސްތިއުމާރުކޮށްފައި އޮތް ފަލަސްތީންގެ ބިންތަކުގައި އާބާދުވެގެން ތިބި ޔަހޫދީންގެ އާއިލާތައް ވެސް ވަނީ ވިއްސިވިހާލިވެފަ އެވެ.

ސަހްޔޫނީންނާއި ހިޒްބުﷲގެ މި ހަމަނުޖެހުންތައް ފެށުނީ މިދިޔަ އަހަރުގެ އޮކްޓޯބަރު މަހުގެ 8 ވަނަ ދުވަހު ފަލަސްތީނުގެ ގާޒާއަށް ސަހްޔޫނީން ދޭން ފެށި ހަމަލާތަކާ އެކު ހިޒްބުﷲ އިން ސަހްޔޫނީނަށް ހަމަލާ ދޭން ފެށުމުންނެވެ.

ލުބުނާނުގައި 2023 ވަނަ އަހަރުގެ އޮކްޓޯބަރު މަހުން ފެށިގެން މިހާތަނަށް 3951 އަށް ވުރެ ގިނަ މީހުން ހަމަލާތަކުގައި މަރުވެ، 15740 އަށް ވުރެ ގިނަ މީހުން ޒަހަމްވެފައިވާ އިރު، އެއް މިލިއަނަށް ވުރެ ގިނަ މީހުން ވަނީ ގެދޮރު ދޫކޮށް ދާން މަޖުބޫރުވެފަ އެވެ.

ސަހްޔޫނީންގެ އުދުވާނުގައި ގެދޮރު ނެތިކޮށްލާފައިވާ މީހުންގެ އަދަދު 1.2 މިލިޔަނަށް އުފުލިފައިވާއިރު, އދން ބުނީ އޭގެ ތެރެއިން ގިނަ އަދަދެއްގެ ބަޔަކު މި ވަގުތު ދިރިއުޅެމުން ދަނީ މަގުތަކުގެ މަތީގައި ކަމުގައެވެ.

ހަނގުރާމަ ހުއްޓާލަން ހެދި އެއްބަސްވުމާ ހިޒްބުﷲ އިން ހިލާފުވެއްޖެ ނަމަ، އިޒުރޭލަށް ފެނުނު ކޮންމެ ވަގުތެއްގައި ހަމަލާތައް ފަށާނެ ކަމަށް ސަހްޔޫނީން ވަނީ ބުނެފަ އެވެ.