ފެނަކައިގެ ސައްތައިންސައްތަ ހިއްސާ، ސްޓޭޓް ޓްރޭޑިން އޯގަނައިޒޭޝަން ޕަބްލިކް ލިމިޓެޑް (އެސްޓީއޯ)އިން ގަނެ އެ ކުންފުނީގެ ސަބްސިޑަރީ ކުންފުންޏެއްގެ ގޮތުގައި ހެދުމަށް ކުރަމުން ދިޔަ މަސައްކަތް ހުއްޓާލައިފި އެވެ.

އެސްޓީއޯގެ ދަށަށް ފެނަކަ ބަދަލުކުރަން ސަރުކާރުން ނިންމީ މިިދިޔަ އޯގަސްޓް މަހުގެ ތެރޭގަ އެވެ.

އެސްޓީއޯއިން ބުނީ އެ މަސައްކަތް ހުއްޓާލަން ފިނޭންސް މިނިސްޓްރީން އަންގާފައިވާ ކަމަށެވެ.

މި އެންގުމާއެކު އެސްޓީއޯ އިން ސަރުކާރަށް ކުރިން ހުށަހެޅި އެކުއިޒިޝަން ޕްރޮޕޯސަލްގައި ހިމަނާފައިވާ ކަންކަން ކުރިއަށް ގެންގޮސްފައިވާ މިންވަރަށް ބަލައި، އެސްޓީއޯ އިން ފެނަކައިގެ ހިއްސާ ގަތުމުގެ މަސައްކަތް ހުއްޓާލުމަށް ޑިރެކްޓަރުންގެ ބޯޑުންވެސް މިއަދު ނިންމާފައިވާ ކަމަށް އެސްޓީއޯ އިން ބުނެ އެވެ.

ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި ފެނަކައިގެ ދަރަނި އިތުރުވެ، ކުންފުނީގެ މުވައްޒަފުންގެ އަދަދު ބޮޑުތަނުން މަތިވެ މާލީ މައްސަލަތަކެއްގެ ތެރެއަށް ވެއްޓިފައިވާ ކަމަށް ކުންފުނިން ބުނެ އެވެ. ސަޕްލަޔަރުންނަށް ދޭން ޖެހޭ ފައިސާގެ އަދަދު އެތައް ބިލިއަން ރުފިޔާއަކަށް އަރަ އެވެ.

ހަރަދު ކުޑަކުރުމުގެ ގޮތުން ފެނަކައިން އަންނަނީ ކޮންޓްރެކްޓްގެ ދަށުން ނަގާފައި ހުރި މުވައްޒަފުން ވަކިކުރަމުންނެވެ. އެގޮތުން މިހާތަނަށް 900އަށް ވުރެ ގިނަ މުވައްޒަފުން ވަކިކޮށްފައިވާ ކަމަށް ބުންޏެވެ.

މީގެ އިތުރުން ފެނަކަ އަދިވެސް ފާހަގަވެފައި އޮންނަނީ މިހާރު ވެސް ކޮރަޕްޝަން އިންތިހާއަށް ފެތުރިފައިވާ ތަނެކެވެ.