އިންޓަނޭޝަނަލް ރެސިޑެންސް އެންޑް ސިޓިޒެންޝިޕް އެޑްވައިޒަރީ ފާމު ހެންލީ އެންޑް ޕާޓްނާޒް އިން ދޭ ގްލޯބަލް ސިޓިޒަން އެވޯޑު ކުރީގެ ރައީސް މުހައްމަދު ނަޝީދަށް ލިބިވަޑައިގެންފި އެވެ.

މީގެ ކުރިން ވެސް ބައިނަލްއަގުވާމީ ތަފާތު އެވޯޑްތައް ހާސިލްކުރައްވާފައިވާ ކުރީގެ ރައީސްއަށް ގްލޯބަލް ސިޓިޒަންޝިޕް އެވޯޑް ހަވާލުކުރީ އެމެރިކާގެ ނިއު ޔޯކްގައި އޮތް ރަސްމިއްޔާތެއްގަ އެވެ.

އެ އެވޯޑް ލިބިވަޑައިގަތުމުން ދަ ޑިމޮކްރެޓްސް ޕާޓީން ނެރުނު ބަޔާނުގައި ބުނީ ނަޝީދަކީ މުޖުތަމައުގެ ކުރިއެރުމަށް އާދަޔާހިލާފް މަސައްކަތްތަކެއް ކުރައްވާ ބޭފުޅެއް ކަމަށެވެ.

މިއެވޯޑާ އެކު ސެޓްފިކެޓަކާއި 20000 ޑޮލަރުވެސް ރައީސް ނަޝީދަށް ލިބިވަޑައިގެންނެވި އެވެ.

ރާއްޖޭގެ ސިޔާސީ ދާއިރާއިން ދުރަށް ވަޑައިގެން ނަޝީދު މިހާރު ދިރިއުޅުއްވަނީ ކްލައިމެޓް ވަލްނަރަބަލް ފޯރަމްގެ ސެކްރެޓަރީ ޖެނެރަލްގެ މަސްއޫލިއްޔަތުތައް އަދާކުރެއްވުމަށް ގާނާގަ އެވެ.

ބޭރުގެ ނޫހެއްގައި ބުނީ އެ ފޯރަމް ހިންގުމުގެ އިސްވެރިއެއްގެ ހައިސިއްޔަތުން 70 ގައުމެއް ތަމްސީލުކޮށް، ވަކާލާތުކުރެއްވުމުގެ މަސައްކަތް ނަޝީދު ކުރައްވާ ކަމަށެވެ. އޭގެ އިތުރުން ރާއްޖެ އާއި ބައިނަލްއަގްވާމީ ފެންވަރުގައި ކްލައިމެޓް ރެޒިލިއަންސް ޕްރޮޖެކްޓްތައް ހިންގުމުގައި އެ މަނިކުފާނު އުޅުއްވި ކަމަށް ވެސް ބުނެފައިވެ އެވެ.

ގްލޯބަލް ސިޓިޒެންޝިޕް އެވޯޑްއަކީ އިންސާނީ ކުރިއެރުމާއި ހިމާޔަތުގައި ދުނިޔޭގެ ފެންވަރުގައި މަސައްކަތްކުރައްވާ ބޭފުޅުންގެ އަގުވަޒަންކުރަން އެ ކުންފުނީގެ ސީއެސްއާރު ޕްރޮގްރާމްގެ ދަށުން ކުރިއަށް ގެންދާ ކަންކަމުގެ ތެރެއިން ބައެކެވެ.