ގޭންގް ކުށްތަކަށް އަދަބު ލިބެންޖެހޭ ގޮތާއި މެދު ރައްޔިތުންގެ މަޖިލީހަށް ހުށަހަޅާފައިވާ ބިލާއި ގުޅޭގޮތުން ރައީސް އަބްދުﷲ ޔާމީން އަބްދުލްގައްޔޫމް މި ސަރުކާރަށް ވަރަށް ބޮޑަށް ފާޑުވިދާޅުވެއްޖެއެވެ.

ޕީއެންއެފްއިން ސިލްސިލާކޮށް ބާއްވަމުން އަންނަ ފްރޮންޓް އޮފީސް ޖަލްސާގައި ރޭ ވާހަކަފުޅު ދައްކަވަމުން އެމަނިކުފާނު ވިދާޅުވީ ގޭންގް ތަކުން ހިންގަމުން އަންނަ ނުރައްކާތެރި ކުށްތަކަށް އަދަބު ދެނީ ޝަރީއަތް މެދުވެރިކޮށް ނޫން ކަމަށާއި އެކުލަވާލާފައިވާ "ޚާއްސަ" ކޮމިޓީއަކުން ކަމަށެވެ.

މީގެ އިތުރުން، މިހާރު ފާސްކުރަން ހުށަހަޅާފައިވާ ގާނޫނުގައި ފުލުހުންގެ އިދާރާގެ ތަހުގީގަށް "ޚާއްސަ އުކުޅުތައް" ބޭނުން ކުރުމުގެ ހުއްދަ ހިމަނާފައިވާ ކަމަށާއި އެއީ ސީދާ އަނިޔާވެރިވުން ކަމުގައި ރައީސް ޔާމީން ފާހަގަކުރައްވާފައިވެއެވެ.

ދުނިޔޭގެ އެންޓި ޓޯޗަރ ކޮމިޝަންގައި ދިވެހި ރާއްޖެ ބައިވެރިވެފައިވާ ކަން ފާހަގަކުރައްވާ އެ ވިދާޅުވާ ޚާއްސަ އުކުޅުތައް ބޭނުންކުރާ ވާހަކަ ގާނޫނުގައި ހިމެނިގެން ނުވާނެކަމަށް ރައީސް ޔާމީން ވިދާޅުވިއެވެ.

މަޖިލީހުގެ އަޣުލަބިއްޔަތު ސަރުކާރަށް އޮތުމުން މިފަދަ ފޭރާން ދަށް ނުކުތާތައް ހިމަނަމުންދާ ކަމަށާއި މިއީ އެއްގޮތަކަށްވެސް ކުރެވިގެންވާނެ ކަމެއް ނޫންކަމަށް އެމަނިކުފާނު ވަނީ ގޮވާލާފައެވެ.

އަދި އަމިއްލަ މަންފާ ހާސިލުކުރުމަށް ސަރުކާރުން ފޭހޭ އިލޮށި އަނބުރާ އެމީހުންގެ ލޮލަށް ހެރޭނެ ދުވަސް އަދި އަންނާނެ ކަމަށް އެމަނިކުފާނުގެ ވާހަކައިގައި ވަނީ ފާހަގަކުރައްވާފައެވެ.

މި ޒަމާނުގެ ތަހުޒީބާއި އެކު ކުރިއަށްދާންވީ ވަގުތު ސަރުކާރުން ސިޔާސަތުތައް ބައްޓަންކުރަނީ މީގެ 30 އަހަރު ކުރީގެ ގޮތްތަަކަށް ކަމަށް ބުނެ ރައީސް ޔާމީން ވަނީ ޖަލްސާގައި ސަރުކާރަށް ވަރަށް ބޮޑަށް ފާޑުވިދާޅުވެފައެވެ.