ވަކި މީހަކު އިސްތިސްނާނުކޮށް ބައިނަލްއަގުވާމީ ކޯޓުތަކުގެ އަމުރުތައް ރާއްޖެއިން ތަންފީޒުކުރާނެ ކަމަށާއި ސަހްޔޫނީންގެ ބޮޑުވަޒީރު ބެންޖަމިން ނަތަންޔާހޫ ރާއްޖެ އެތެރެ ވެއްޖެ ނަމަ ހައްޔަރު ކުރުމުގެ އަމުރު ވެސް ތަންފީޒުކުރާނެ ކަމަށް ހޯމްލޭންޑު ސެކިއުރިޓީ މިނިސްޓަރު އަލީ އިހުސާން ރޭ ވިދާޅުވެއްޖެ އެވެ.

ޔަހޫދީންގެ ޣައިރު ގާނޫނީ އަނިޔާވެރި ދައުލަތް ސަހްޔޫނީންގެ އަނިޔާވެރި ބޮޑުވަޒީރު ނަތަންޔާހޫ އާއި ކުރީގެ ޑިފެންސް ސެކެރެޓަރީ ޔޯވް ގަލަންޓް ހައްޔަރުކުރުމުގެ އަމުރެއް ބައިނަލްއަގުވާމީ ޖިނާއީ ކޯޓުން މީގެ ހަފްތާއެއް ކުރިން ވަނީ ނެރެފަ އެވެ.

އެ އަމުރު ތަންފީޒު ކުރައްވާނެ ކަމަށް ރައީސް މުއިއްޒުގެ ސަރުކާރުން ވިދާޅުވާއިރު ސަހްޔޫނީންގެ ޕާސްޕޯޓް މައްސަލަ ސަރުކާރުގެ އަގުލަބިއްޔަތު އޮތް ކޮމިޓީ މަރުހަލާގައި ހުއްޓިފައި އޮތުމާ ގުޅިގެން އިދިކޮޅު މެންބަރުން ވަނީ، އެ ބިލުގެ މަސައްކަތް އަވަސްކުރުމަށް ގޮވާލައި، ކުއްލި މައްސަލަތައް ވެސް މަޖިލީހަށް ހުށަހަޅާފަ އެވެ. އެހެން ނަމަވެސް ސަރުކާރުގެ ސުޕަމެޖޯރިޓީ އޮންނަ މަޖިލީހުން އަދި ވެސް އަންނަނީ އެ މައްސަލަތައް ބޭރުކުރަމުންނެވެ.

މަޖިލީހުގެ ސަލާމަތީ ހިދުމަތްތަކާބެހޭ ކޮމިޓީއަށް ސަހްޔޫނީންގެ ޕާސްޕޯޓް މަނާކުރުމާ ބެހޭ މައްސަލަ އެޖެންޑާކޮށްފައިވާއިރު، އެ ޕާސްޕޯޓް މަނާކުރުން އަވަސްނުކޮށް ސަރުކާރުގެ މެޖޯރިޓީ އޮތް މަޖިލީހުން އަންނަނީ ސަރުކާރުން ބޭނުންވާ ބިލުތައް އެއް ދުވަސްތެރޭވެސް ނިންމާ ފާސްކުރަމުން ނެވެ.

އިހުސާން ރޭ "އެކްސް"ގައި ކުރެއްވި ޕޯސްޓެއްގައި ވަނީ ރާއްޖެއަކީ އިންޓަނޭޝަނަލް ކޯޓުތަކުގެ އަމުރުތައް ވަކި މީހަކު އިސްތިސްނާ ނުކޮށް ތަންފީޒުކުރާނެ ގައުމެއް ކަމަށް ވިދާޅުވެފަ އެވެ.  ނަމަވެސް މިހާރު ވަނީ އެ ޓްވީޓް ވެސް ސަހްޔޫނީންގެ އިންޒާރަށް ޑިލީޓް ކޮށްފަ އެވެ.

އެ ކޯޓުން އަމުރު ނެރުމާއެކު، ގިނަ ގައުމުތަކަކުން ވަނީ ނަތަންޔާހޫ ހައްޔަރުކުރާނެ ކަމަށް ބުނެފައެވެ. މި ގޮތުން، ނެދަލޭންޑްސް، އިޓަލީ، ސްވިޒަލޭންޑް، އަޔަލޭންޑް، ބެލްޖިއަމް އަދި ފްރަންސް ފަދަ ހުޅަނގުގެ ގައުމުތަކުންވެސް، ނަތަންޔާހު ޒިޔާރަތްކޮށްފިނަމަ ހައްޔަރުކޮށް، ކޯޓާ ހަވާލުކުރާނެކަމަށް ރަސްމީކޮށް ވަނީ ބުނެފަ އެވެ.

ނަމަވެސް މިއަދު އުފެދޭ ސުވާލަކީ ފަލަސްތީނުގެ ދަރިފަސްކޮޅު ނައްތާލުމަށް ސަހްޔޫނީން ހިންގަމުންދާ ގަތުލުއާންމާ ދެކޮޅަށް އެމީހުންގެ ޕާސްޕޯޓް މަނާކޮށްލަން ނުކެރުނު ބަޔަކަށް ނަތަންޔާހު ހައްޔަރު ކުރަން ކެރޭނެ ހެއްޔެވެ.؟