ކުށްތަކަށް އަރައިގަތުމާއި، ފާފަކުރުން ގިނަވި ނަމަވެސް އިސްލާހުވެ، ދީނަށާއި އުންމަތަށް ޚިދުމަތް ކުރުމަކީ އިސްލާމްދީނުގައި އަބަދުވެސް ހުޅުވިފައިވާ ދޮރެއްކަން ކަމަށް މިއަދުގެ ހުކުރު ޚުތުބާގައި ވިދާޅުވެއްްޖެއެވެ.

މިއަދުގެ ހުކުރު ހުތުބާގައި ވަނީ އަލްޚުލަފާއުއް ރާޝިދޫންގެ ހަޔާތްޕުޅުގެ އެކި ދަރުސްތަކަށް އަލިއަޅުވާލާފައެވެ.

މިގޮތުން، މާތް ﷲ ކޮންމެ ނަބިއްޔަކަށްމެ އެ ބޭކަލަކަށް ތަބައާވާނޭ ސަހާބީން ލެއްވި ކަމަށާއި އެކަލާނގެ މި އުންމަތަށް ކައުކުރެއްވި ނަބިއްޔާގެ އަސްހާބުންވެފައި ވަނީ އުންމަތް ދެކެފައިވާ ރަންމުތްތަކެއްކަމުގައި ކަމަށް ޚުތުބާގައި ފާހަގަކޮށްފައިވެއެވެ. އަދި އޭގެ ތެރެއިން ވެސް ދިހަ ބޭކަލަކު ހާއްސަކުރައްވައި އެ ބޭކަލުންނަށް ސުވަރުގޭގެ އުފާވެރިކަމުގެ ހަބަރު ދެއްވި ކަމަށް ހުތުބާގައި ވިދާޅުވިއެވެ.

މުސްލިމުންގެ އެންމެ ފުރަތަމަ ހަލީފާއަކީ އަބޫބަކުރުގެ ފާނެވެ. އެކަލޭގެފާނު ވެވަޑައިގެންފައިވަނީ އީމާންކަމާއި ހެޔޮ އަމަލުގައި ނަމޫނާ ބޭކަލެއްކަމުގައި ކަމަށް ހުތުބާގައިވެއެވެ.

އަލްހުލަފާއުއްރާޝިދޫންގެ ތެރެއިން ދެވަނަ ހަލީފާއަކީ އުމަރުގެ ފާނެއެވެ. އެކަލޭގެފާނަކީ، އިސްލާމްވެވަޑައިގަތުމުގެ ކުރީގައި މައްކާގެ މުޝްރިކުންގެ ތެރެއިން ނަބިއްޔާގެ މައްޗަށް އެންމެ އަދާވާތްތެރި އެއް ބޭކަލެއް ކަމަށް ހުތުބާގައިވެއެވެ. ނަމަވެސް މާތްﷲ އެކަލޭފާނަށް ހިދާޔަތް ދެއްކެވުމާއެކު، ދީނުގެ ދިފާއުގައި ވަގުތުން މަސައްކަތް ފެއްޓެވި ކަމަށް ހުތުބާގައިވެއެވެ.

މުސްލިމުންގެ ތިންވަނަ ހަލީފާ އުސްމާނުގެ ފާނު ފާހަގަކުރެވެނީ އަހްލާގީ ރިވެތި ސިފަތައް ލިބިވަޑައިގެންވާ ލަދުވެތި ބޭކަލެއްގެ ގޮތުގައި ކަމަށާއި މަލާއިކަތުން ވެސް އެކަލޭގެފާނު ދެކެ ލަދުވެތިވެވަޑައިގަންނަވާކަމުގައި ރަސޫލާ ހަދީސްކުރައްވާފައިވާ ކަމަށް ހުތުބާފައިވެއެވެ

މުސްލިމުންގެ ހަތަރުވަނަ އަދި އެންމެ ފަހު ޚަލީފާ އަލީގެފާނަކީ ހިތްވަރުގަދަކަމުގެ ރަމްޒެއް ކަމަށް ހުތުބާގައިވެއެވެ. ހަނގުރާމައިގެ މައިދާނުގައްޔާއި،ޚަލީފާކަމުގައި ބޮޑެތި ފިތުނަތަކެއްގެ ތެރޭގައި އެކަލޭގެފާނު ދެއްކެވި ގިޔާދަތާއި، ހިތްވަރަކީ ތާރީހު ހެކިދޭ ކަންކަން ކަމަށެވެ.

އެހެންކަމުން މާޒީގައި ކުށްތަކަށް އަރައިގަތުމާއި، ފާފަކުރުން ގިނަވިޔަސް އިސްލާހުވެ، ދީނަށާއި، އުންމަތަށް ހިދުމަތްކުރުމަކީ ހުޅުވިފައިވާ ދޮރެއްކަމަާއި އެހާ ފަސޭހައިން މީސްތަކުންނާ މެދު އުންމީދު ކަނޑައިލައިގެން ނުވާނެކަން ކަމަށް ހުތުބާގައިވެއެވެ.

އަހަރުމެން މުސްލިމުންނަކީ ތާރީޚުން އިބްރަތް ލިބިގަނެ ދީނުގެ ދިފާއުގައި މަސައްކަތްކުރާ ބަޔަކަށް ވާންޖެހޭ ކަމަށް މިއަދުގެ ޚުތުބާގައި ވަނީ ނަސޭހަތްތެރިވެފައެވެ.