އެކްސްގައި ކުރި ޕޯސްޓަކާ ގުޅިގެން އެމްޑީޕީގެ އެކްޓިވިސްޓަކު ފުލުހަށް ހާޒިރުވާން އަންގައިފި އެވެ.

ފުލުހުން ޗިޓު ފޮނުވައިފައިވަނީ އެމްޑީޕީގެ ސޯޝަލް މީޑިއާ އެކްޓިވިސްޓު ހުސެއިން ޝާފިއު (ތުއްތު)އަށެވެ.

އެ ޗިޓުގައި ބުނެފައި ވަނީ މިމަހުގެ އަށް ވަނަ ދުވަހުގެ 01:14 ގައި އޭނާގެ ހޭންޑަލްއިން ހަޑިހުތުރުބަސް ބޭނުންކޮށް ބިރުވެރިކަން އުފެދޭގޮތަށް އެކްސްގައި ޕޯސްޓްކޮށްފައި ވާކަމަށެވެ. ނަމަވެސް އޭނާ ކޮށްފައިވާ ޕޯސްޓުގެ ތަފްސީލު ފުލުހުން ހާމަކޮށްފައެއް ނުވެއެވެ.

އެ މައްސަލައިގައި އޭނާގެ ބަޔާންނެގުމަށް މާދާމާގެ 13:30 ގައި ސާޖަންޓް އާދަމް ހަލީމް ކްރިމިނަލް އިންވެސްޓިގޭޝަން ބިލްޑިންއަށް ހާޒިރުވުމަށް އޭނާއަށް ފޮނުވާފައިވާ ޗިޓުގައި ވަނީ ބުނެފައެވެ.

މި ޗިޓާމެދު ހިތްހަމަނުޖެހުން ފާޅުކުރައްވައި އެމްޑީޕީގެ ޗެއާޕާސަން ފައްޔާޒު އިސްމާއިލް ވަނީ ރައީސުލްޖުމްހޫރިއްޔާ އާއި ސަރުކާރުގެ އިސްވެރިންގެ "އަބުރުފުޅު"ގެ ހިމާޔަތުގައި ކައުންސިލަރުންނާ ދެކޮޅަށް ފިޔަވަޅު އަޅަން ފަށައިފި ކަމަށް ވިދާޅުވެފައެވެ.

ޝާފިއު އަކީ އެމްޑީޕީގެ ސޯޝަލް މީޑިއާގައި ވަރަށް ހަރަކާތްތެރި އެކްޓިވިސްޓެކެވެ.

ޝާފިއުގެ އިތުރުން ރައީސް ޑރ. މުހައްމަދު މުއިއްޒު އާއި ސަރުކާރުގެ އިސްވެރިންގެ "އަބުރުފުޅަށް" އެރި ކަމަށް ބުނެ ކައުންސިލަރުންނަށް ވެސް ފިޔަވަޅު އަޅަން ފަށާފައިވާ ކަމަށް ފައްޔާޒް ވިދާޅުވި އެވެ. އޭނާ ފާހަގަކުރެއްވީ ރައީސްގެ އަބުރަށް އަރައިގަތް ކަމަށް ބުނެ ގދ. ގައްދޫ ކައުންސިލްގެ ރައީސްގެ މައްސަލަ ބެލުމަށް އެލްޖީއޭ އިން އެންގި މައްސަލަ އަށެވެ.

މީގެ އިތުރުން، ރައީސް މުއިއްޒު އޯގަސްޓު، 2024، ސިންގަޕޫރުގެ ޝޮޕިން މޯލެއްގައި އުޅުއްވަނިކޮށް ފޮޓޯއެއް ނެގި މައްސަލަ ވެސް ފުލުހުން އަންނަނީ ތަހުގީގު ކުރަމުން ނެވެ.

ހިޔާލުފާޅުކުރުމާއި އެއްވެ އުޅުމުގެ މިނިވަން ކަމަށް ރައީސް މުއިއްޒު ސަރުކާރުން އަންނަނީ ވަރަށް ބޮޑަށް ހުރަސް އަޅަމުން ނެވެ.