ފުލުހުންގެ ތަހުގީގުން ކައްޒާބަކީ ކާކުކަން ފުލުހުންގެ ފަރާތުން ސާފުވާނެ ކަމަށް އުއްމީދު ކުރާ ކަމަށް ޝާފިއުގެ ވަކީލު އިބްރާހިމް ޝިޔާން ވިދާޅުވެއްޖެ އެވެ.

ފުލުހުންނަށް ޝާފިއު ދިން ބަޔާނުގައި ބުނެފައި ވަނީ އެ ޕޯސްޓުގައި އެއްވެސް މީހެއްގެ ހިތުގައި ބިރުވެރިކަން އުފެދިދާނޭ ފަދަ ވާހަކައެއް ނޯންނާނެެ ކަމަށާއި އެ ޕޯސްޓުގައި ބުނާ "ކައްޒާބު" ވަކި މީހަކަށް ނިސްބަތް ކުރީ ފުލުހުން ކަމަށެވެ.

މިއަދު މެންދުރު 1:30 ގައި ޝާފިއު ހާޒިރުކުރީ ހެންވޭރު ފުލުސް އޮފީހަށެވެ. އެތަނުގެ ބޭރުގައި ހުންނަވާ ނޫސްވެރިންނާ ވާހަކަ ދައްކަވަމުން ޝިޔާން ވިދާޅުވީ ފުލުހަށް ހާޒިރުކުރި އިރު އޭނާއަށް ވެސް ކައްޒާބަކީ ކާކުކަން ނޭނގޭ ކަމަށެވެ.

ޝިޔާން އިތުރަށް ވިދާޅުވީ، ފުލުހުން ކުރާ ތުހުމަތު ނުވަތަ ތުއްތުގެ ޕޯސްޓުގައި ދީފައިވާ އިންޒާރު އަމާޒުވަނީ ކޮން ފަރާތަކަށްތޯ ތަކުރާރުކޮށް ފުލުހުންނާ ސުވާލު ކުރި ކަމަށެވެ. ނަމަވެސް އެއީ ކޮން ފަރާތެއްކަން ފުލުހުންނަށް ބުނެ ނުދެވުނު ކަމަށް އެނާ ވިދާޅުވި އެވެ.

ޝާފިއުގެ މައްޗަށް ފުލުހުން ކުރަނީ އަނިޔާއެއް ދީފާނެކަމުގެ ބިރު ދެއްކުމުގެ ކުށާއި މީހަކު މަރުވެދާނެ ނުވަތަ އޭނާގެ ހަށިގަނޑަށް ބޮޑު އަނިޔާއެއް ލިބިދާނެ ކަމެއްގެ ބިރެއް ކުރިމަތި ކުރުވުމުގެ ކުށް އަދި ހަޑިހުތުރު އެއްޗެއް ހިމެނޭ ވަސީލަތެއް ޝާއިއު ކުރުމާއި އާންމުކޮށް ހުޅުވާލައިގެން ދެއްކުމާއި އެފަދަ އެއްޗެއް ފޯރުކޮށްދިނުމުގެ ކުށުގެ ތުހުމަތެވެ.

ޝާފިއު، ފުލުހަށް ހާޒިރުކުރުމާ ގުޅިގެން އެމްޑީޕީގެ ގާނޫނީ ވަކީލުންގެ ޓީމުގައި ހިމެނޭ އައިކު އަހުމަދު އީސާ ވިދާޅުވީ މިއަދު ފެނުނީ ފުލުސް އޮފީހުގެ ތެރެއަށް ސިޔާސީ ނުފޫޒު ވެއްދިތަން ކަމަށެވެ. އަދި އާންމު ރައްޔިތަކު ހިޔާލުފާޅުކުރުމަކީ ނުވަތަ ބަސް ބުނުމުގެ މިނިވަންކަމަކީ ސީދާ ގާނޫނުއަސާސީން ލިބިދޭ ހައްގެއް ކަމަށް އައިކު ވިދާޅުވި އެވެ.

އެކްސްގައި ޝާފިއު ކުރި ޕޯސްޓަކާ ގުޅިގެން މިއަދު މެންދުރުފަހު ފުލުހުންގެ އިދާރާއަށް ހާޒިރު ކުރުމުން އެ ސަރަހައްދުގައި އެމްޑީޕީގެ އާންމު މެންބަރުން މިއަދު ވަނީ ހިތްހަމަނުޖެހުން ފާޅުކޮށް އަޑު އުފުލައިފަ އެވެ. އޭގެތެރޭގައި އެމްޑީޕީގެ މަޖިލިސް މެންބަރުންނާއި ލީޑަޝިޕުގެ ބޭފުޅުން ވެސް ހިމެނިވަޑައިގަންނަވަ އެވެ.