މިނިވަން މުއައްސަސާތަކަށް އަތް ނުބާނާނެ ކަމަށް ބުނެ ރައީސް މުހައްމަދު މުއިއްޒު ދެއްކެވި ވާހަކަވެސް ދިމާނުވާ ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވެފައިވަނީ ޕީއެންއެފުން ބުރާސްފަތި ދުވަހުގެރޭ ބޭއްވި ޖަލްސާގައި ވާހަކަފުޅު ދައްކަވަމުންނެވެ.

ރައީސް މުއިއްޒަކީ ބަހާ އަމަލާ ދިމާ ނުވާ ވެރިއެއްގެ ގޮތުގައި ގިނަ ބަޔަކު މިއަދު ގަބޫލުކުރަމުން ގެންދާއިރު އެމަނިކުފާނު ވަނީ މިިނިވަން މުއައްސަސާތަކުގެ ބާރު ކަނޑުވާނުލާނެ ކަމަށާ މިނިވަން މުއައްސަސާތަކަށް އަތް ނުބާނާނެ ކަމަށްވެސް ވިދާޅުވެފައެވެ.

ނަމަވެސް ރައްޔިތުންގެ މަޖިލިސް މެދުވެރިކޮށް އޭސީސީ އާ އިލެކްޝަން ކޮމިޝަން ފަދަ މުއައްސަސާތަކުގެ ވެރިން އައްޔަން ކުރާނީ ރައީސުލްޖުމްހޫރިއްޔާކަމަށް ކަނޑައަޅާ ވަނީ ބިލުތައް ފާސްކުރުވާފައެވެ.

އެކަމަށް އިޝާރާތްކުރައްވާ ރައީސް ޔާމީން ވިދާޅުވީ ދިވެހިރާއްޖެ މިދިޔައީ 30 އަހަރު ފަހަތަށް ކަމަށެވެ. އެމަނިކުފާނު ވިދާޚުވީ މިނިވަން މުއައްސަސާތަކަށް އަތް ނުބާނާނެ ކަމަށް ބުނެ ރައީސް މުއިއްޒު ދެއްކި ވާހަކަވެސް ދިމާނުވާ ކަމަށެވެ.

ރައީސް ޔާމީން ވަނީ މި ސަރުކާރުގައި ކޮރަޕްޝަން އިންތިހާއަށް އިތުރުވެފައިވާތީ ކަންބޮޑުވުން ފާޅުކުރައްވާފައެވެ. އަދި ރައީސް ޔާމީން ވިދާޅުވީ ކޮރަޕްޝަނަކީ މި ސަރުކާރުގައި ގައިން ގަޔަށް އަރާ ބައްޔަކަށްވެފައިވާ ކަމަށެވެ.