އުތުރު އިންޑިއާގެ ވައި ތަޣައްޔަރުވެ، އެކަމުގެ އަސަރު ރާއްޖެއަށް ވެސް ކުރަން ފަށައިފިއެވެ.
ކޮންމެ އަހަރެއްގެވެސް މި ދުވަސްވަރަކީ އިންޑިޔާގެ ވައި ތަޣައްޔަރު ވުމުގެ ސަބަބުން އޭގެ އަސަރު ރާއްޖެއަށް ކުރާ ދުވަސްވަރެކެވެ.
ޖައްވުގެ ނުސާފުކަން އަންގައިދޭ "އައިކިއު އެއާ" އިން ދައްކާ ގޮތުގައި މިއަދު މެންދުރު މާލޭގެ ވައިގެ ކޮލިޓީ ހުރީ 82 ގައެވެ. އަދި ވިލިމާލޭގެ ވައިގެ ކޮލިޓީ ހުރީ 84 ގައެވެ. މިއީ މޮޑެރޭޓް ލެވެލްއެކެވެ. އެކަމަކު، އިއްޔެ ވިލިމާލޭގެ ވައިގެ ކޮލިޓީ ހުރީ 139 ގައެވެ. އެއީ ސިއްހަތަށް ގެއްލުން މިންވަރެކެވެ.
އުތުރު އިންޑިއާގެ ސަރަހައްދުތަކުން އަންނަ މި ތަޣައްޔަރު ވައިގައި އެކުލެވިގެން ވަނީ ހިރަފުހާއި ކާރުހާނާތަކުން އަރާ ދުމެވެ. މިކަމުގެ ސަބަބުން ވައި ނުސާފުވެ ދުރު ފެންނަވަރު ވަރަށް ބޮޑަށް ދަށްވެ، ދަތުރުފަތުރު ކުރުމަށާއި އެހެނިހެން ކަންކަމަށް އުނދަގޫވެއެވެ.
ރާއްޖެ ސަރަހައްދުގެ ވައިގެ ކޮލިޓީ މި ހަފްތާގައި ސިއްހީ ގޮތުން ނުރަނގަޅު މިންވަރަކަށް ދާން ފަށާފައިވާ ކަމަށް ފެކަލްޓީ އޮފް އިންޖިނިއަރިން، ސައިންސް އެންޑް ޓެކްނޮލޮޖީން ކުރި ޕޯސްޓެއްގައި ބުނެފައިވެއެވެ.
މެޓް އޮފިހުން ވިދާޅުވި ގޮތުގައި ޑިސެންބަރު މަހާއި މާޗް މާހާއި ދޭތެރޭގައި އާންމު ގޮތެއްގައި ވައިގެ ކޮލިޓީ ދަށްވާނެ ކަމަށް ބެލެވެއެވެ.
