އިތުބާރު ނެތްކަމުގެ ވޯޓެއް ނަގައި ފްރާންސް ބޮޑު ވަޒީރު މިޝެލް ބާނިއާ ވެރިކަމުން ދުރުކުރުމާ ގުޅިގެން ފްރާންސްގެ ސަރުކާރު ވެއްޓިއްޖެއެވެ.

ފްރާންސްގެ ޕާލަމެންޓްގެ ތިރިގޭގައި 577 މެންބަރުން ތިއްބަވާ އިރު ބޮޑުވަޒީރުގެ އިތުބާރު ނެތް ކަމަށް ފާސްކުރެވެނީ 289 ވޯޓުންނެވެ. ބާނިއާގެ އިތުބާރު ނެތް ކަމަށް އިދިކޮޅު ނެޝަނަލް ފްރޮންޓުން ހުށަހެޅި މައްސަލަ ފާސްކުރީ 331 ވޯޓާ އެކުގަ އެވެ.

ބާނިއާ ދެކޮޅަށް ހުށަހެޅި ހުށަހެޅުމަށް ތާއީދުކޮށް މަޖިލީހުގެ މެންބަރުން ވޯޓު ދެއްވީ ބޮޑު ވަޒީރުކަމުގެ މަގާމަށް ބާނިއޭ އައްޔަން ކުރެއްވިތާ އެންމެ ތިން މަސް ދުވަސް ވީތަނާ އެވެ.

ފްރާންސްގެ ބޮޑުވަޒީރު މިޝެލް ބާނިއާގެ އިތުބާރު ނެތް ކަމަށް އެގައުމުގެ ޕާލަމެންޓުން ފާސްކުރީ ޑެފިސިޓް ކުޑަކުރުމަށް ޓަކައި، ހަރަދު ކުޑަކުރުމުގެ ބައެއް ފިޔަވަޅުތައް އަޅާށާއި ބައެއް ޓެކްސްތައް ނަގާ ގޮތަށް އެކުލަވާލައިފައި އޮތް 2025 ބަޖެޓް، ޕާލަމެންޓަށް ހުށަނާޅާ ކުރިއަށް ގެންދަވަން އުޅުއްވުމުންނެވެ.

ބާނިއާގެ ސަރުކާރު ވެގެން މިދިޔައީ 1958 ވަނަ އަހަރުން ފެށިގެން މިހާތަނަށް ފްރާންސްގައި އެންމެ ކުރު މުއްދަތަކަށް ވެރިކަން ކުރި ސަރުކާރަށެވެ.

ބާނިއާގެ ސަރުކާރު ވެއްޓުމާއިއެކު ރައީސްކަމުގައި މެކްރޮން އަށް ވެސް ދެމިހުންނެވޭނެ ކަމާ މެދު ވެސް މިހާރު ވަނީ ސުވާލު އުފެދިފަ އެވެ. މެކްރޮން ވަނީ އިއްޔެގެ ވޯޓުގެ ނަތީޖާ ކޮންމެ ގޮތަކަށް ނިކުތް ނަމަވެސް އިސްތިއުފާ ނުދެއްވާނެ ކަމަށް ވިދާޅުވެފަ އެވެ.