ދިވެހިރާއްޖެއަކީ ޒަމާނުއްސުރެ މެހެމާންދާރީ އަދާކުރުމުގައި ނަމޫނާ ބަޔެކެވެ. އަމާންކަމަށާއި ސުލްހް މަސަލަސްކަމަށް ލޯބިކުރާ ބަޔަކު އުޅޭ ގައުމެކެވެ. ސައްތައިން ސައްތަ މުސްލިމުން އުޅޭ މި ގައުމަކީ މުސްލިމް އެހެން ގައުމުތަކަށްވެސް އިހުތިރާމްކުރާ، އެ ބަޔަކީވެސް އަޚުންނާއި އުޚުތުން ކަމަށް ދެކިގެން އުޅޭ ބަޔެކެވެ.

މުސްލިމު ގައުމެއްގެ ބަޔަކަށް ދެރައެއް ލިބޭ ހިނދު، އެއީ ދިވެހިންނަށްވެސް ލިބެމުންދާ އަނިޔާއެއް ކަމަށް ދެކި އެފަދަ ގައުމުތަކުގެ ދިފާއުގައި އަބަދުވެސް ވަކާލާތު ކުރަމުން އަންނަ ބަޔެކެވެ.

ޒަމާނުއްސުރެ ދިވެހީންނަށް ލިބިފައިވާ ރީތި ނަން އަދި ލަގަބު އަދުގެ ސަރުކާރުން ވަނީ ނިގުޅައިގަނެފައެވެ. 12 އަހަރު ވަންދެން އަމާންކަމާއި ސުލްހަވެރިކަމާއިއެކު ރާއްޖޭގައި ދިރިއުޅެމުން އައި ފަރަންސޭސީވިލާތުގެ އާއިލާއެއް މަޖުބޫރުން ޑީޕޯޓްކުރަން އުޅޭ ކަމުގެ ވާހަކަ އަޑުއެހީ ފުން ހިތާމައާއި އެކުގައެވެ.

ދިވެހީންނަށް އެހީތެރިކަން ފޯރުކޮށްދިން ނަމޫނާ ޢާއިލާއަކަށްވީ ނަމަވެސް، ވިސާނެތި މިތަނުގައި ދިރިއުޅެމުން އައި މި ޢާއިލާއަށް މިހާރު ކުރިމަތިވެފައިވަނީ އަނިޔާވެރި އަދި ހިތްދަތި ނަސީބެކެވެ.

އަމިއްލަ ގައުމުގައި އަނިޔާވެރިކަމާއި ބޮޑެތި ތަކުލީފުތައް ތަހައްމަލުކޮށް މި އާއިލާ ރާއްޖޭގައި ވަޒަންވެރިވީ ފޮނި އުއްމީދުތަކަކާއި އެކުގައެވެ. އިސްލާމް ދީނާއި މުޖުތަމައުގެ އަސާސްތައް، އޭރު އެމީހުންގެ ކިބައިގައި އޮތް އަޚްލާޤުތައް ޤަބޫލުކުރި ޤައުމެއްގައި ރަނގަޅު ދިރިއުޅުމެއް ހޯދުމަށް މި ޢާއިލާ ރާއްޖެ އައީ މީގެ ބާރަވަރަކަށް އަހަރު ކުރިންނެވެ.

ވޭތުވެދިޔަ އަހަރުތަކުގައި މި އާއިލާ ދިވެހި މުޖުތަމައުގެ ތެރެއަށް ގުޅި، ބަސް ދަސްކޮށް، އެކުވެރިކަން އުފައްދައި، ދިވެހިންނަށް އެހީތެރިކަން ފޯރުކޮށްދީ ކުދި ވިޔަފާރިއެއް ވެސް ހުޅުވިއެވެ.

ނަމަވެސް ސުލްހަވެރިކަމާއެކު އެމީހުން ތިބި ނަމަވެސް ދިވެހި ސަރުކާރުން ވަނީ ޒަމާނުއްސުރެ އިހުމާލުވެފައި އޮތް ވިސާ ޓެކްނިކަލިޓީއެއްގެ ސަބަބުން އެމީހުން ޑީޕޯޓް ކުރަން އިޚްތިޔާރުކޮށް ހަރުކަށި ފިޔަވަޅު ތަކެއް އަޅަން ނިންމައިފަ އެވެ.

ކަމާބެހޭ ފަރާތްތަކުން ކުއްލިއަކަށް ނިންމި، މި ނިންމުމުގެ ސަބަބުން އާއިލާ ހަލާކުވެ، ކުޑަ ކުދިން ރޮމުން ދިޔައީ އެކުދިންގެ ގެއާއި ރައްޓެހިންނާއި އެކުދިން ދަންނަ ދިރިއުޅުން ގެއްލިދާނެ ކަމުގެ ބިރަށެވެ.

ކޮންމެ ގައުމެއްގައިވެސް އުޅެވޭނީ އެ ގައުމެއްގެ ގަވާއިދާއި އެއްގޮތަަށް ކަމަށް ވިޔަސް އެ ބަޔެއްގެ ފަރާތުން މިހާތަނަށް އެއްވެސް ގެއްލުމެއް ލިބިފައިނުވާ މި އާއިލާ އާއި މެދު ސަރުކާރުން ކަންތައް ކުރަން ނިންމާފައިވަނީ އެންމެ އިންސާފުވެރިކޮށް ނޫންކަމަށް ދިވެހި ހުރިހާ ރައްޔިތުން އަންނަނީ ބުނަމުންނެވެ.

ޑީޕޯޓް ކުރުމުގެ ބަދަލުގައި ގާނޫނާއި ގަވާއިދާއި އެއްގޮތުގެ މަތިން ރާއްޖޭގެ ރަށްވެހިކަން ދެވެން އޮތް އިރުގައި ސަރުކާރުން އިޚްތިޔާރު ކުރީ އެންމެ އަނިޔާވެރި ގޮތެވެ. އަނިޔާވެރި ސަރުކާރަކުން އިތުރު ގޮތަކަށް އަމަލުކޮށްފާނެ ކަމަށް ހީކުރުމަކީވެސް މޮޔަ ކަމެކެވެ.

މި ޙާލަތުން ދޭހަވަނީ ދިވެހި ސަރުކާރުގެ ޢަމަލުތަކުގައި ހުރި ބޯދާ ޚިޔާލުތަފާތުވުންތަކެވެ. ފަލަސްޠީނާއި ދުނިޔޭގެ އެކި ކަންކޮޅުތަކުގައި ތިބި ނިކަމެތި މުސްލިމް މުޖުތަމަޢުތަކަށް ތާއީދުކޮށް، ރާއްޖެއިން ބޭރުގައި ތިބި މުސްލިމުންގެ ޙައްޤުތަކުގެ ދިފާޢުގައި ސަރުކާރުން ވާހަކަ ދައްކަމުން ދިޔަނަމަވެސް، އެޤައުމުގެ އަމިއްލަ ބޯޑަރުގެ ތެރޭގައި މުސްލިމުންނަށް އެފަދަ އޯގާތެރިކަމެއް ފޯރުކޮށްނުދެވުނެވެ. ހިތާމަވެރިކަން މަންޒަރެކެވެ.

އިސްލާމީ ރިވެތި އަޚްލާޤަށް ދިފާއުކުރާ ޤައުމެއްގެ ގޮތުގައި ގިނަފަހަރަށް ސިފަކުރާ ޤައުމެއް ކަމުގައިވާ ދިވެހިރާއްޖެ މިހާރު މިވަނީ މި މައްސަލައިގެ ސަބަބުން މުސްލިމް ގައުމުތަކުގެ ކުރިމަތީގައި އަގު ވެއްޓިފައެވެ.

ދިވެހި ރައްޔިތުން މިއަދު ސަރުކާރާއި ދެކޮޅަށް އަޑުއުފުލަމުންދާއިރު، ސަރުކާރުގެ މި ސްޓޭންޑުގެ ސަބަބުން ސަރުކާރަށް ގިނަ ސުވާލުތަކެއް އުފެދިގެންދެއެވެ.ފަލަސްތީނާއި ދެކޮޅަށް ސަހްޔޫނީން ހިންގަމުންދާ ލާއިންސާނީ އަނިޔާ ކުށްވެރިކުރާ ގައުމަކުން އަމިއްލަ ގައުމުގައި މުސްލިމުންނާ ދެކޮޅަށް މިފަދަ ލާއިންސާނީ އަމަލެއް ހިންގުން "ޖަސްޓިފައި" ކުރާނީ ކިހިނެއް ހެއްޔެވެ؟ ޤައުމުގެ ޘަޤާފަތާއި ޢަޤީދާ ޤަބޫލުކުރުން ފިޔަވައި އެހެން ކަމެއް ނުކުރާ ޢާއިލާއަކަށް ފުރަގަސްދީގެން ތިބޭއިރު ޢަދުލުވެރިކަމާއި ރަޙްމަތާއި އުޚުއްވަތްތެރިކަމުގެ އަސާސްތައް ދަމަހައްޓާނީ ކިހިނަކުން ހެއްޔެވެ؟

މި އާއިލާ ޑީޕޯޓްކޮށްފިނަމަ މުސްލިމް ޤައުމުތަކާއެކު އެއްބައިވަންތަކަން އޮތްކަމަށް ދިވެހި ސަރުކާރުން ދައްކަމުންދާ ވާހަކަތަކުގެ އިޚްލާޞްތެރިކަމާމެދުވެސް ސުވާލު އުފެދެއެވެ. އަމިއްލަ ބިމުގައި ސުލްހަވެރިކަމާއެކު ދިރިއުޅެމުން އަންނަ އެކުވެރި މުސްލިމުންގެ ޙައްޤުތައް ނިގުޅައިގަނެ، ރާއްޖެއިން ބޭރުގައި ތިބި މުސްލިމުންނަށް ލިބެމުންދާ ހިތާމަތައް ސަރުކާރުން ކުށްވެރިކުރާނީ ކިހިނަކުން ހެއްޔެވެ؟