އެންޓި ކޮރަޕްޝަން ކޮމިޝަން (އޭސީސީ)އިން، ފްލެޓް ދިންގޮތުގެ މައްސަލަ ބެލުމަށްފަހު އެކުލަވާލި ލިސްޓު ހާމަކުރުމަށް މިނިސްޓްރީ އޮފް ހައުސިން އިން ދެކޮޅު ހަދައިފިއެވެ.

މި ސަރުކާރު އައިސް މާގިނަ ދުވަސްތަކެއް ނުވެ، ކުރީ ސަރުކާރުން ދީފައި ހުރި ފްލެޓުތަކކަކީ ހައްގުވެރިންނަށް ދީފައި ހުރި އެއްޗެއް ނޫން ކަމަށް ބުނެ ލިސްޓު އަލުން ދިރާސާ ކުރުމަށާ އެކަމުގައި ކޮރަޕްޝަންއަށް މަގު ފަހިވާ ކަންކަން ހުރި ކަމަށް ބުނެ އޭސީސީއަށް މައްސަލަ ބެލުމަށް ހުށަހެޅިއެވެ.

އޭގެ ފަހުން އަހަރެއްވެސް ފާއިތުވެފައިވީ ނަމަވެސް އަދިވެސް ފްލެޓު ލިސްޓު ހާމަކުރެވޭ ވަރު މި ސަރުކާރަށް ނުވެއެވެ. އެހެން އެކަން އޮއްވާ، އޮންލައިން ނޫހެއް ކަމަށްވާ "ހުރިހާ" އިން މައުލޫމާތު ހޯދާ ލިބިގަތުމުގެ ގާނޫނުގެ ތެރެއިން އެ ލިސްޓްތައް ހޯދުމަށް ހައުސިން މިނިސްޓްރީގައި އެދުމުން މިނިސްޓްރީން ދިން ޖަވާބުގައި ވަނީ ގެދޮރުވެރިޔާ ސްކީމާ ގުޅިގެން މިހާރު ކުރިއަށްދަނީ ރީ-އިވެލުއޭޝަންގެ މަސައްކަތް ކަމަށްވާތީ އެ މައުލޫމާތު މިވަގުތު ހާމަކުރެވެން ނެތް ކަމަށެވެ.

"ހުރިހާ" އިން ހާމަކުރި ގޮތުގައި ލިސްޓު ހޯދަން އެދުނު ސަބަބަކީ ފްލެޓް ލިސްޓްތަކަށް ސިޔާސީ އެކި ބޭފުޅުންގެ ނުފޫޒުން ބަދަލުތަކެއް ގެންނަމުންދާ ކަމުގެ ތުހުމަތުތައް އެކި ފަރާތްތަކުން ކުރާތީ، އެ ލިސްޓަށް ބަދަލެއް ގެނެސްފައިވާކަން ނުވަތަ ނޫންކަން ކަށަވަރު ކަމާއެކު ހާމަކުރުމުގެ ބޭނުމުގައެވެ.

އެ ނޫހުގައި ހައުސިން މިނިސްޓްރީގެ އޮފިޝަލަކާ ހަވާލާދީ އިތުރަށް ރިޕޯޓުކޮށްފައިވާ ގޮތުގައި، ހުޅުމާލޭ ދެވަނަ ފިޔަވަހީގައި އިމާރާތްކޮށްފައިވާ ފްލެޓްތައް ބެހުމަށްޓަކައި ޕީއެންސީގެ މަޖިލިސް މެމްބަރުން ހައުސިން މިނިސްޓްރީއަށް ލިސްޓްތަކެއް ފޮނުވާފައިވެއެވެ.

މައުލޫމާތު ލިބިފައިވާ ގޮތުގައި ގަވާއިދާ ޚިލާފުކަމެއް ކުރާތީ ފޮރުވުމަށްޓަކައި ލިސްޓުތައް ފޮނުވާފައި ހުރީ ނުރަސްމީ ކޮށެވެ. އެކި މެމްބަރުން އެކި އަދަދުތަކުގެ ލިސްޓްތައް މިނިސްޓްރީއަށް ފޮނުވާފައިވާއިރު އެއް މެމްބަރަކު ފޮނުވި ލިސްޓްގައި ގާތްގަނޑަކަށް 100 ވަރަކަށް މީހުންގެ ނަން އެބައޮތް ކަމަށް އޮފިޝަލް ވިދާޅުވިއެވެ. އެއީ އެންމެ ގިނަ މީހުންގެ ނަން ހިމެނޭ ލިސްޓެވެ. ދެން ފޮނުވި ލިސްޓްތަކުގައި ހުރީ ގާތްގަނޑަކަށް 50 މީހުންގެ ނަމެވެ. އަދި މި ލިސްޓުތަކުގައި ދުވަހަކު މާލޭގައި ދިރިނޫޅޭ މީހުންވެސް ހިމެނޭ ކަމަށްވެއެވެ.

މިނިސްޓްރީގެ އޮފިޝަލް ވިދާޅުވީ ލިސްޓް ނެރުން މުއްދަތެއް ނެތްގޮތަށް ފަސްކުރީ މަޖިލިސް މެމްބަރުންގެ ފަރާތުން ލިބިފައިވާ ލިސްޓްތަކުގައިވާ ނަންތައް އެ ލިސްޓްގައި ހިމެނުމަށް އިތުރު ވަގުތު ބޭނުންވާނެތީއެވެ.

ދިޔަ ނޮވެމްބަރު މަހުގެ 14 ވަނަ ދުވަހު، ގެދޮރުވެރިޔާ ސްކީމުން ފްލެޓު ލިބުނު މީހުންގެ ލިސްޓު އެ ހަފްތާ ނިމުމުގެ ކުރިން އާންމުކުރާނެ ކަމަށް ވަޒީރުކަމުގައި ހުންނެވި އަލީ ހައިދަރު ވިދާޅުވި ނަމަވެސް އަދިވެސް އެ ލިސްޓު އާންކޮށްފައި ނުވެއެވެ.