ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ)އާ މޯލްޑިވިސް މީޑިޔާ ހައުސް (އެމްއެމްއެޗް)ގެ މައްޗަށް މޯލްޑިވިސް މަނިޓަރީ އޮތޯރިޓިއިން އެސްޓީއާރު ނެރެން ޖެހޭ ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވެފައިވަނީ ހޯމަ ދުވަހުގެ ރޭ ޕީއެންއެފުން ބޭއްވި ޖަލްސާގައި ވާހަކަފުޅު ދައްކަވަމުންނެވެ.

ރައީސް ޔާމީން ވިދާޅުވީ، ދާދި ފަހުން ތިލަވެގެން އުޅޭ އެންސްޕާގެ އެއްބަސްވުމެއްގެ މައްސަލައަކީ ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ)އާ މޯލްޑިވިސް މީޑިޔާ ހައުސް (އެމްއެމްއެޗް)އާ ގުޅިގެން ހިންގާފައިވާ މަނީ ލޯންޑަރ ކުރުމުގެ ހަރަކާތެއް ކަމަށާ އެކަން ސާފުކޮށް ބަލާ ފިޔަވަޅު އަޅަން ޖެހޭ ކަމަށެވެ.

އެގޮތުން އެ މުއާމަލާތް ކުރި ޗެކުގެ މައުލޫމާތަކީ އެމްއެމްއޭއަށް ވަންނާނެ ޗެކެއްކަމަށާ އެހެންކަމުން އެމްއެމްއޭއަށް އެކަން ނޭނގި ނޯންނާނެ ކަމަށްވެފައި އެކަމުގައި ގަވަރުނަރު ޑރ އަހުމަދު މުނައްވަރުއާ އަދި އެމްއެމްއޭގެ އިސްވެރިން ހަނު ތިބުމަކީ އެކަމުގެ ހައްލެއް ނޫން ކަމަށް ރައީސް ޔާމީން ވިދާޅުވިއެވެ.

ރައީސް ޔާމީން ވިދާޅުވީ، މިއީ ގާނޫނީ ހުކޫމާތު ދަމަހައްޓަން ކުރަން ޖެހޭ ކަމެއް ކަަމަށެވެ. ނަމަވެސް މިހާރު މި ގައުމުގައި ސަރުކާރުން ގާނޫނު ދަމަހައްޓަން މަސައްކަތްކޮށް ރޫލު އޮފް ލޯ ޕްރެކްޓިސް ކުރާ ކަމާ މެދު ސުވާލު އުފެދޭ ކަމަށް ރައީސް ޔާމީން ވިދާޅުވިއެވެ.