އިމާމުވެ ހުކުރު ކުރާނެ ޒުވާން ޚަތީބުން ތަމްރީނު ކުރަން އިސްލާމިކް މިނިސްޓްރީން ފަށާފައި އޮތް ޕްރޮގްރާމްގެ ދަށުން އައްޑޫގައި ކުރިއަށް ގެންދިޔަ ބެޗްގެ ބައިވެރިންނަށް ސަނަދު ހަވާލުކޮށްފި އެވެ.

އިސްލާމިކް މިނިސްޓްރީން ބުނީ، އައްޑޫ ސިޓީގައި ކުރިއަށްގެންދިޔަ ޒުވާން ޚަތީބުންގެ ޕްރޮގުރާމަށް ބޮޑު ތަރުހީބެއް ލިބުނު ކަމަށެވެ. އެކަމަށްޓަކައި އައްޑޫގައި ބޭއްވި ރަސްމިއްޔާތުގައި އިސްލާމީ މަރުކަޒުގެ އިސް އިމާމު ފަޟީލައްތުއްޝައިޚް މުހައްމަދު ލަޠީފް ވަނީ ބައިވެރިވެވަޑައިގެންފައެވެ.

އެ ޕްރޮގުރާމް ނިންމާ 18 ބައިވެރިއަކު ވަނީ ސަނަދު ހާސިލްކޮށްފަ އެވެ.

ޒުވާން ޚަތީބުން ތަމްތީނު ކުރުމުގެ ޕްރޮގްރާމަކީ ގްރޭޑް 10، 11 އަދި 12 ގައި އުޅޭ ދަރިވަރުންނަށާއި ސްކޫލް ނިމިފައިވާ ދަރިވަރުންނަށް ހުކުރު ކުރުމުގެ ހުއްދަ ދޭން ކުރިއަށް ގެންދާ ޕްރޮގްރާމެކެވެ.

އަމާޒަކީ އިމާމުވެ ހުކުރުކުރާ ޒުވާން އާ ޖީލެއް އުފެއްދުން ކަމަށް އިސްލާމިކް މިނިސްޓްރީން ބުންޏެވެ.

މިހާތަނަށް ޒުވާން ޚަޠީބުން ޕްރޮގުރާމުގެ ދަށުން 270 ޒުވާން ޚަޠީބުން ސެޓްފިކެޓް ހާސިލުކޮށްފައިވެ އެވެ. މިނިސްޓްރީގެ އަމާޒަކީ ފަސް އަހަރުތެރޭ 1،000 ޒުވާން ޚަޠީބުން އުފެއްދުމެވެ.