ސަހްޔޫނީން ފަލަސްތީނާއި ދެކޮޅަށް ކުރަމުން އަންނަ ހަނގުރާމައިގައި ފަލަސްތީނުގެ ރައްޔިތުންގެ ހައްގުގައި ސަހްޔޫނީންގެ ޕާސްޕޯޓް މަނާކުރުމަށް ސަރުކާރަށް ގޮވާލަމުން އަންނަތާ އަހަރަކަށް ވުރެ ގިނަ ދުވަސް ވެއްޖެއެވެ.

އެހެން ނަމަވެސް "މަޝްވަރާ" ކުރުމުގެ ނަމުގައި ސަރުކާރުން އަންނަނީ ޕާސްޕޯޓް މަނާކުރުމުގެ މައްސަލަ ވަކި މުއްދަތެއް ނެތް ގޮތުގައި ފަސްކުރަމުންނެވެ.

ސަރުކާރަށް ސަހްޔޫނީންގެ ޕާސްޕޯޓް މަނާކުރަން ނުކެރުނު އިރު އެ ގައުމުން އަންނަނީ ދިވެހިރާއްޖެއަށް ދަތުރުނުކުރުމަށް ބުނެ އެ ގައުމުގެ ރައްޔިތުންނަށް އިލްތިމާސް ކުރަމުންނެވެ.

މިގޮތުން، ދިވެހިރާއްޖޭގައި ނިރުބަވެރިން ނުވަތަ ޓެރަރިސްޓުންނަށް ތާއިދު ކުރާ މީހުން ތިބި ކަމަށް ބުނެ ޒަރޫރީ ބޭނުމަށް ނޫނީ ރާއްޖެއަށް ނުދިއުމަށް ސަހްޔޫނީންގެ ރައްޔިތުންނަށް ވަނީ އަންގާފައެވެ.

ސަހްޔޫނީންގެ ސަލާމަތީ މަޖިލީހުން ބުނީ، ރާއްޖެއަށް އޮތް އެލާޓް ލެވެލް މަތިކޮށްފައިވަނީ ރާއްޖޭގައި ނިރުބަވެރިންނަށް ތާއިދު ކުރާ މީހުން ތިބުމުންނާއި ރާއްޖޭން އެ ގައުމުގެ ރައްޔިތުންނާއި މެދު ހަރުކަށި ފިޔަވަޅުތައް އަޅަމުން އަންނަތީ ކަމަށެވެ.

ސަހްޔޫނީން ރާއްޖެއާއި މެދު ފިޔަވަޅުތައް އަޅާ ނިރުބަވެރިންގެ ގޮތުގައި ލޭބަލް ކުރަމުން އަންނައިރު ދިވެހިރާއްޖޭގެ ސަރުކާރު އޮތީ ހަނުއެވެ.

ބައިނަލްއަގްވާމީ ޕްލެޓްފޯމްތަކުގައި ފަލަސްތީނުގެ ހައްގުގައި ވާހަކަދެއްކުމުން އެކަނި ނުފުދެއެވެ. ރާއްޖެއާއި ދެކޮޅަށް ބޮޑެތި ތުހުމަތުތައް ސަހްޔޫނީން ކޮށްފައިވާ އިރު އެކަމަށް ހަނު ތިބުމަކީ ފަލަސްތީނުގެ މައްސަލައިގައި ސަރުކާރުގެ ސްޓޭންޑް ވަރަށް ސާފުވެގެން ދާ ކަމެކެވެ.