ގާނޫނު އަސާސީ އިސްލާހު ކުރީމަ މަޖިލިސް މެންބަރުން ކޮންޓްރޯލަށް ދިޔަކަމަށް ސަރުކާރަށް ހީވުމަކީ ކުށް ހީއެއް ކަމަށާއި މިހާލަތު ފުރޮޅިގެން ދާކަށް ވަގުތެއް ނުނަގާނެ ކަމަށް ރައީސް އަބްދުﷲ ޔާމީން ވިދާޅުވެއްޖެ އެވެ.

ރައީސް ޔާމީން މިހެން ވިދާޅުވީ ޕީއެންއެފް އިން ބުރާސްފަތި ދުވަހުގެރޭ ބޭއްވި އެ ޕާޓީގެ ފްރަންޓް އޮފީސް ޖަލްސާގައި ވާހަކަފުޅު ދައްކަވަމުންނެވެ.

ގާނޫނުއަސާސީ އަށް ގެނައި އިސްލާހުގައި ބުނާ ގޮތުން ވަކި ސިޔާސީ ޕާޓީއެއްގެ ފަރާތުން މަޖިލިސް އިންތިހާބުގައި ވާދަކޮށްގެން އިންތިހާބުވުމަށް ފަހު، އެ ދައުރުގެ ތެރޭގައި އެ ސިޔާސީ ޕާޓީއަކުން އަމިއްލަ އަށް ވަކިވެއްޖެ ނަމަ ނުވަތަ ޕާޓީން ވަކިކޮށްފި ނަމަ ނުވަތަ އެހެން ސިޔާސީ ޕާޓީއެއްގެ މެންބަރަކަށް ވެއްޖެ ނަމަ އެ މީހަކު މަޖިލީހުގެ މެންބަރުކަމުން ވަކިވާނެ އެވެ.

ގާނޫނުއަސާސީއަށް ގެނައި ބަދަލާމެދު ގާނޫނީ ވަކީލުންނާއި މަދަނީ ޖަމިއްޔާތަކުން ވަނީ ކަންބޮޑުވުން ފާޅުކޮށްފަ އެވެ. ނަމަވެސް އެންމެ ހަ ގަޑިއިރު ތެރޭގައި ގާނޫނުއަސާސީ ބަަދަލުކުރީ ރައީސް ޑރ. މުއިއްޒުގެ އޯޑރަށް ޕީއެންސީގެ 78 މެންބަރުންގެ ތާއިދާއެކު އެވެ.

ރައީސް ޔާމީން ވިދަޅުވީ، އެމަނިކުފާނު މިނިވަންކަމާއެކު ދޫކޮށްލާފައި ބަސްކިޔޭ ގޮތަށް އެނބުރޭ ކަމަށްވަންޏާ ސަރުކާރުން މިހާރު މިހިންގާ ކޮރަޕްޝަންގެ ޖަރީމާތަކެއް ނުހިންގޭނެ ކަމަށާއި، އެއީކީ ވާނެ ކަމެއް ނޫން ކަމަށެވެ.

ރައީސް ޔާމީން ވިދާޅުވީ ސަރުކާރުގައި ފައިސާ ހުރުމުން އަދި ސަރުކާރުގައި ނުފޫޒު އޮތީމައި ވަރަށް ގިނަ ކަންތައް ކުރެވިދާނެ ކަމަށާއި، ރައްޔިތުން މަޖިލީހުގެ ބޮޑު މެޖޯރިޓީއެއް ލިބި، ގާނޫނު އަސާސީ ވެސް ބޭނުންވާ ގޮތަކަށް ބަދަލުކުރެވިދާނެ ކަމަށެވެ. ނަމަވެސް ހާލަތު ބަދަލުވުމަށް ލަހެއް ފަހެއް ނުވާ ކަމަށެވެ.

ރައީސް ޔާމީން އިތުރަށް ވިދާޅުވީ އެދެނީ މުއިއްޒު އަމިއްލަ އަށް އެންމެންނަށް ދެއްވާ ނަސޭހަތް އަމިއްލަ އަށް ގަބޫލު ކޮށް ހެޔޮ ބަސް އަހާ ހެޔޮ ބަސް ގަބޫލު ކުރާ މީހަކަށް ވުން ކަމަށެވެ. އަދި ރައީސް މުއިއްޒުގެ ބައްޕާފުޅުގެ ފޮތުން ވަކި ބައިތަކެއް ނުނެއްގެވުމަށް ރައީސް ޔާމީން މުއިއްޒު އަށް އިލްތިމާސް ކުރެއްވި އެވެ.

ރައީސް ޑރ. މުހައްމަދު މުއިއްޒު ވެރިކަމަށް އައި މެންޑޭޓާ ހިލާފުވެވަޑައިގެންނެވި ކަމަށާއި، ވެވަޑައިގެންނެވި އަހުދާ ހިލާފުވުމުން ދެން ވެރިކަމުގައި ހުރުމުގެ ހައްގެއް ނެތް ކަމަށް ވެސް ރައީސް ޔާމީން މިފަހުން ވަނީ ވިދާޅުވެފަ އެވެ.