މި ސަރުކާރަށް ސަނާކިޔަން ޖެހޭ ވަރުގެ ކަމެއް އަދި ކުރެވިފައި ނެތް ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވެފައިވަނީ ހޯމަ ދުވަހުގެރޭ ޕީއެންއެފްއިން ބޭއްވި ޖަލްސާގައި ވާހަކަފުޅު ދައްކަވަމުންނެވެ.

ރައީސް ޔާމީން ވިދާޅުވީ ސަރުކާރުގެ ފުރަތަމަ އަހަރުތެރޭ ރައީސް ޑރ. މުހައްމަދު މުއިއްޒުގެ ވައުދު ފޮތުން ރައްޔިތުންނާއި ހަމައަށް އެއްވެސް ކަމެއް ކޮށްދެވިފައި ނެތް ކަމަށެވެ. އެހެންކަމުން، ސަރުކާރަށް ސަނާ ކިޔަން ބޭނުންވިޔަސް ސަނާ ކިޔޭނެ ގޮތެއް ނެތް ކަމަށް ވިދާޅުވިއެވެ. އަދި ވިދާޅުވީ ޕީއެންސީގެ ތެރެއިން ބަޔަކަށް މި އެއް އަހަރު ރަން ވެގެން އުޅެނީ އެބަޔަކަށް ރަނުން ވައްކަން ކުރަން ލިބުމުން ކަމަށެވެ.

ރައީސް ޔާމީން ވަނީ ރައްޔިތުންނާ މެދު ސަރުކާރުން ކަންކުރަމުން އަންނަ ގޮތާ މެދުވެސް ކަންބޮޑުވުން ފާޅުކުރައްވާފައެވެ. އެގޮތުން ރައްޔިތުންނަށް ތެލާ ކަރަންތު ފަދަ އަސާސީ ޚިދުމަތްތަކުން ދެމުން އައި ސަބްސިޑީ ކަނޑާލުމުގެ އަޑުތައް ގަދަވެފައިވާއިރު، ރައީސް ޔާމީން ވަނީ އެކަމަށް ވާހަކަފުޅު ދައްކަވާފައެވެ.

އެގޮތުން ރައީސް ޔާމީން ވިދާޅުވި، ރާއްޖޭގެ އިގުތިސާދު މި ހާލަތުގައި އޮއްވައި ސަބްސިޑީތައް ކަނޑާލުމުން އެއީ ރައްޔިތުންގެ ރިހޭ ފައި މައްޗަށް ފޮއެ ވެއްޓުން ކަމަށެވެ.

ދައުލަތުގެ އާމްދަނީއަށް ލިބޭ އެއްޗެއް މަދު ނަމަވެސް، ސަރުކާރުގެ ހަރަދުތައް ކުޑަ ނުކުރާތީވެސް ރައީސް ޔާމީން ފާޑުވިދާޅުވެފައިވެއެވެ. އަދި މިކަމަކީ ބޭރުގެ އިދާރާތަކުން ވެސް ފާހަގަކުރަމުން ގެންދާ ކަމެކެވެ.

މި ސަރުކާރު ވެރިކަމަށް އައީ 700 އަށްވުރެ ސިޔާސީ މުވައްޒަފުންގެ އަދަދު ގިނަ ނުކުރާނެ ކަމުގެ ވައުދާއެކު އެވެ. ނަމަވެސް, އެ އަދަދު 4,000 އަށްވުރެ އިތުރުވާނެ ކަމަށް އެކި މަސްދަރުތަކުން ހޯދި މައުލޫމާތުތަކުން ވަނީ އެނގިފައެވެ.

ފިނޭންސް މިނިސްޓްރީން އާންމުކޮށްފައިވާ މާލީ ހިސާބުތަކުން ދައްކާ ގޮތުގައި، މި އަހަރު ނިމޭ އިރު ޖުމްލަ ދަރަނި 139 ބިލިއަން ރުފިޔާ އަށް އަރާނެ އެވެ. އެ އަދަދު 150 ބިލިއަން ރުފިޔާ އަށް އަރާނެ ކަމަށް އަންނަ އަހަރުގެ ބަޖެޓުގައި ލަފާކޮށްފައި ވެ އެވެ. އެއީ ޖީޑީޕީގެ ނިސްބަތުން 124 ޕަސެންޓެވެ.