ރޯދަ މަހުގެ ތެރޭގައި އެއްވެސް އިންތިހާބެއް ނުބޭއްވޭ ގޮތަށް ރައްޔިތުން މަޖިލީހަށް ހުށަހެޅި އިސްލާހު ބަލައިގެންފިއެވެ.

އިދިކޮޅު އެމްޑީޕީގެ  ފަރާތުން އިންތިހާބުތަކާ ބެހޭ ގާނޫނަށް ހުށަހެޅި އިސްލާހު ބަލައިގަނެ، އެ ބިލުގެ މަސައްކަތް އަވަސްކުރުމުގެ ގޮތުން ފަސް މެންބަރުންގެ ކޮމިޓީއަކަށް ފޮނުވަންވެސް ހޯމަ ދުވަހު ވަނީ ފާސްކޮށްފައެވެ.

ބިލުގެ އިބްތިދާއީ ބަހުސްގައި އެމްޑީޕީގެ ފަރާތުން ހުޅުމާލެ ދާއިރާގެ މެންބަރު އަލީ ނިޔާޒު ހުށަހެޅުއްވީ ބިލުގެ މަސައްކަތް ވީހާވެސް އަވަހަކަށް ކުރަން ފަސް މެންބަރުންގެ ކޮމިޓީއެއް އެކުލަވާލައި، އެ ކޮމިޓީއަށް ފޮނުވުމަށެވެ. އެ ހުށަހެޅުމަށް ތާއީދުކުރެއްވީ ޑިމޮކްރެޓްސްއަށް ނިސްބަތްވެވަޑައިގެންނަވާ މާފަންނު މެދު ދާއިރާގެ މެންބަރު އިބްރާހިމް ރަޝީދު (ބޮންޑޭ) އެވެ.

ހޯމަ ދުވަހު ބޭއްވި މި އަހަރުގެ ފުރަތަމަ ދައުރުގެ ފުރަތަމަ ޖަލްސާގައި އެ ބިލުގެ އިބްތިދާއީ ބަހުސް ނިންމުމަށް ފަހު، ބިލު ބަލައިގަތުމަށް ފާސްވީ އިދިކޮޅު 39 މެންބަރުންގެ ވޯޓުންނެވެ. ބިލާ ދެކޮޅަށް ވޯޓު ދެއްވީ ސަރުކާރަށް ތާއިދުކުރައްވާ 11 މެންބަރުންނެެވެ.

މައްސަލަ ދިރާސާ ކުރުމަށް އެކުލަވާލި ކޮމިޓީގައި ސަރުކާރަށް ނިސްބަތްވާ އެއްވެސް ޕާޓީއެއްގެ މެންބަރަކު ނުހިމެެއެވެ. އެ ކޮމިޓީގައި ހިމެނެނީ ހެންވޭރު އުތުރު ދާއިރާގެ މެމްބަރު އިބްރާހިމް މުއިއްޒާއި ފުވައްމުލަކު އުތުރު ދާއިރާގެ މެމްބަރު މުހައްމަދު ރަޝީދާއި ކެންދޫ ދާއިރާގެ މެމްބަރު އަލީ ހުސެއިން އާއި މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީގެ އިތުރުން ގައްދޫ ދާއިރާގެ މެމްބަރު އަލީ ޒާހިރެވެ.

އިންތިހާބުތަކާ ބެހޭ އާންމު ގާނޫނުގެ 43 ވަނަ މާއްދާއަށް ހުށަހަޅާފައިވާ އިސްލާހުގައި ބުނެފައިވަނީ އެ ގާނޫނުގައި ނުވަތަ އެހެން ގާނޫނެއްގައި އެހެން ގޮތަކަށް ބުނެފައި އޮތް ނަމަވެސް ރޯދަ މަހުގެ ދުވަހެއްގައި އިންތިހާބެއް ބާއްވާއިގެން ނުވާނެ ކަމަށެވެ. އަދި އިންތިހާބު ބާއްވަންޖެހޭ ތާރީހު ރޯދަ މަހުގެ ދުވަހަކާ ދިމާވާނަމަ، އެ އިންތިހާބެއް ބާއްވަން ވާނީ ރޯދަ މަސް ނިމުމުގެ 10 ދުވަސް ފަހުން ކަމަށް ވެސް ވަނީ ބުނެފައެވެ.

މި އިސްލާހު ހުށަހަޅާފައި މިވަނީ ކުރިއަށް އޮތް ރޯދަ މަހުގެ ތެރޭގައި ރައްޔިތުން މަޖިލީހުގެ އިންތިހާބު ބާއްވަން ނިންމާފައިވަނިކޮށެވެ. އެގޮތުން މާޗް މަހުގެ 17 ވަނަ ދުވަހު އެ އިންތިހާބު ބާއްވަން ނިންމާފައިވާއިރު އެއީ ރޯދަ މަހުގެ 6 ވަނަ ދުވަހެވެ.

ރޯދަ މަހު އިންތިހާބު ބާއްވާތީ އެތައް ބަޔަކު ކަންބޮޑުވުން ފާޅުކުރަމުން ދަނިކޮށް އިސްލާހު ހުށަހަޅާފައިވަނީ އިހަވަންދޫ ދާއިރާގެ މެމްބަރު މުހައްމަދު ޝިފާއުއެވެ.

އެހެންކަމުން އިސްލާހު ފާސްވެ ރޯދައިގެ ފަހުން އިންތިހާބު ބާއްވަން ޖެހުނަސް އިލެކްޝަންސް ކޮމިޝަން އޮންނާނީ ތައްޔާރަށް ކަމަށް އެ ކޮމިޝަނުން މި ފަހުން ވަނީ ބުނެފައެވެ.