ރައްޔިތުންގެ އެތައް މިލިއަން ފައިސާއެއް ހަރަދުކުރާ ދައުލަތުގެ މީޑިއާގެ - ޕީއެސްއެމްގެ އެއްވެސް ޗެނަލަކުން "ކައްޒާބު" ދެއްކުން ސަރުކާރުން މަނާކޮށްފި އެވެ.

"ތޭރަ އޮންލައިން" އަށް މައުލޫމާތު ދެމުން ޕީއެސްއެމްގައި މަސައްކަތް ކުރާ ސީނިއާ މުވައްޒަފަކު ބުނީ "ކައްޒާބު" އަށް ނިސްބަތްކޮށް މީހަކު، އެކްސްގައި ކުރި ޕޯސްޓަކާ ގުޅިގެން އެމީހާ ފުލުސް އޮފީހަށް ހާޒިރުކޮށް މައްސަލަ ބަލަމުން ދާތީ އާއި އަދި ޕޯސްޓް ރައީސް ޑރ. މުއިއްޒުއަށް އަމާޒުވާތީ "ކައްޒާބު" އަކީ ކާކުކަން ސާފުވުމާއި ހަމައަށް ދައުލަތުގެ ޓީވީން "ފެނުއަޑީގެ ކެންސަރު" ޑްރާމާ ނުވަތަ އާންމުންގެ ތެރޭ މަޝްހޫރު "ކައްޒާބު ޑްރާމާ" ދެއްކުން މިހާރު ރައީސުލް ޖުމްހޫރިއްޔާގެ އޮފީހުން އެދިގެން "މަނާ" ކަމަށެވެ.

އަދި ޕީއެސްއެމްގެ ޔޫޓިއުބް ޗެނަލްތަކުން ވެސް އެ ޑްރާމާ ނަގަން އެދިފައިވާ ކަމަށެވެ.

މީގެ ތިރީހަކަށް އަހަރު ކުރިން ދައުލަތުގެ ޓީވީ - ޓެލެވިޒަން މޯލްޑިވްސް އިން ދެއްކި ސްކޫލް ކުދިންތަކެއް ކުޅެފައިވާ ޑްރާމާގެ މެއިން ކާސްޓް އަށް ވަނީ"ކައްޒާބު" ގެ ނަން ދީފަ އެވެ.

މީގެ ކުރިން ދައުލަތުގެ ޓީވީތަކުން ވަރަށް ގިނައިން ދައްކާފައިވާ މި ޑްރާމާ ލިޔުނީ އަދި ލީޑް ރޯލު އަދާކުރީ މިހާރު ވެސް ދައުލަތުގެ މީޑިއާގައި އިސް މަގާމެއްގައި ހުންނެވި އިބްރާހިމް ރަޝީދު (މަހުރަބު އިއްބެ) އެވެ. އިއްބެއަށް އެޑްރާމާގައި ކިޔާ ނަމަކީ "ކައްޒާބު" އެވެ.

ޑްރާމާގައި ކައްޒާބު އަކީ ވަރަށް ލާނަތް ކުއްޖެކެވެ. މުދައްރިސުންނަށް ޖެއްސުންކޮށް އުޅުނު ދަރިވަރެކެވެ. ކުރެހުމުގެ މުބާރާތެއްގައި ކައްޒާބު ހުށަހަޅާ ކުރެހުމަކަށް 1 ވަނަ ވެސް ލިބެ އެވެ. އެ ކުރެހުމާ ބެހޭ ގޮތުން އިނާމު ދިން ޖަލްސާގައި ވާހަކަދައްކަން ފުރުސަތު ލިބެ އެވެ. ކައްޒާބަށް ކިޔާނެ ނުކިޔާނެ އެއްޗެއް ނޭނގެ އެވެ. ހަގީގަތުގައި އެ ކުރެހުމަކީ އެހެން ކުއްޖަކު ކުރެހި ކުރެހުމެކެވެ. ކައްޒާބު ދޮގު ހަދައި އޮޅުވައިލީ އެވެ.

އަރަބިބަހުން ދޮގު ހަދާ މީހުންނާ ދިމާއަށް ކައްޒާބުއޭ ބުނެ މުހާތަބުކުރެ އެވެ.

ރައީސް ޑރ. މުއިއްޒުގެ ސަރުކާރުން ދޮގު ހަދާ ރައްޔިތުންނަށް އޮޅުވާލާތީވެ ބައެއް ސިޔާސީ އެއްވުންތަކުގައި މިފަހުން ސީދާ ރައީސް މުއިއްޒު އާއި ދިމާލައް ވެސް "ކައްޒާބު" އޭ ކިޔަ އެވެ.