ކާށިދޫ ދާއިރާގެ ގޮނޑި އެމްޑީޕީ ޓިކެޓުގައި ފުރަމުން އަންނަ، އަދި ކުރިއަށް އޮތް 20 ވަނަ ރައްޔިތުންގެ މަޖލީހުގެ ކާށިދޫ ދާއިރާގެ ޓިކެޓު އެމްޑީޕީއިން އަބްދުﷲ ޖާބިރު ކަށަވަރުކޮށްފައިވަނިކޮށް، އޭނާ އެ ޕާޓީއިން ވަކި ކުރަން ނިންމައިފިއެވެ.

އެމްޑީޕީއިން މިކަން ހާމަކޮށްފައިވަނީ އެ ޕާޓީއިން ނެރުނު ބަޔާނެއްގައެވެ. އެ ބަޔާނުގައިވަނީ ޖާބިރު އެ ޕާޓީގެ މެންބަރެއްގެ ގޮތުގައި ހުންނަވައި މުޖުތަމައުގެ އާންމު މިންގަނޑާ ޚިލާފަށް ރައްޔިތުންނާ ބޭއަދަބީ ބަހުރުވައިން މުއާމަލާތްކޮށް، މަސްލަހަތު ގެއްލޭގޮތަށް ތަކުރާރުކޮށް އަމަލުކުރައްވަމުންދާ ކަމަށެވެ. އަދި އެ ކަމަކީ އެމްޑީޕީ އާއި އެ ޕާޓީގެ އާންމު މެންބަރުންގެ މަސްލަހަތަށް އުނިކަންލިބޭ ފަދަ އަމަލެއް ކަމަށްވާތީ އެ ޕާޓީގެ ފިޔަވަޅު އަޅާ ކޮމިޓީން އެ މައްސަލަ ބެލުމަށް ފަހު ކަމަށް ޖާބިރުއާ މެދު ފިޔަވަޅު އަޅަން ނިންމާފައިވާ ކަމަށެވެ.

އެގޮތުން އަޅަން ނިންމި ފިޔަވަޅުތަކުގެ ތެރޭގައި 20 ވަަނަ ރައްޔިތުންގެ މަޖިލިސްގެ އިންތިޚާބުގައި އެ ޕާޓީގެ ފަރާތުން ވާދަކުރުމުގެ ފުރުސަތު ނުދިނުމަށާއި، އަދި ހޯމަ ދުވަހުން ފެށިގެން ޕާޓީގެ މެންބަރުކަމުން ޖާބިރު ވަކިކުރުމަށް ޕާޓީގެ ފިޔަވަޅުއަޅާ ކޮމެޓީން ވަނީ ނިންމާފައިވާ ކަމަށް އެމްޑީޕީން ބުނެއެވެ..

ޕާޓީގެ ބަޔާނުގައި އިތުރަށް ބުނެފައިވަނީ, ޖާބިރު އެ ޕާޓީއާ އަލުން ގުޅުމަށް އެދުނުކަމުގައި ވީނަމަވެސް އެފުރުސަތު ލިބޭނީ އެ ޕާޓީގެ ޤައުމީ މަޖިލިހަށް ހުށައަޅައި އެމަޖިލިހުން ނިންމަވާގޮތެއްގެ މަތިންކަމަށެވެ.

އޭގެ އިތުރުން އެމްޑީޕީއާ ގުޅުމުގެ ފުރުސަތު ދެވުނުކަމުގައިވީ ނަމަވެސް އަބްދުﷲ ޖާބިރު އެ ޕާޓީގެ މެންބަރަކަށްވާ ދުވަހުން ފެށިގެން މީލާދީ 5 (ފަހެއް) އަހަރު ދުވަހުގެ މުއްދަތެއް ޕާޓީގެ އެއްވެސް މަޤާމަކަށް އަދި ޕްރައިމަރީއެއްގައި ވާދަކުރުމުގެ ފުރުސަތު ނުލިބޭނެ ގޮތަށް ފިޔަވަޅު އަޅާ ކޮމިޓީން ވަނީ ނިންމާފައެވެ.

ރައްޔިތުންގެ މަޖިލީހުގެ މި ދައުރަށް ޖާބިރު އިންތިޚާބުވީ އަމިއްލަ ގޮތުގައި ވާދަކުރައްވައިގެންނެވެ. އެއީ 2019 ވަނަ އަހަރުގެ މަޖިލިސް އިންތިޚާބަށް އޭނާ އެމްޑީޕީގެ ޓިކެޓަށް ވާދަކުރެއްވުމަށް ފަހު ނާކާމިޔާބުވުމުން އެ ޕާޓީން ވަކިވެވަޑައިގަތުމަށްފަހުއެވެ.

އޭގެ ކުރިން ޖާބިރު ހުންނެވީ، ކުރީގެ ރައީސް މައުމޫން އަބްދުލްގައްޔޫމް އުފެއްދެވި ޑީއާރުޕީގެ ލީޑަރެއްގެ ގޮތުގައެވެ. ނަމަވެސް އެ ޕާޓީގެ މެންބަރުން ހަމަނުވާތީ ޕާޓީ އުވާލަން އިލެކްޝަންސް ކޮމިޝަން (އީސީ)އިން ނިންމުމުން އޭނާ ގްރީން ޕާޓީގެ ނަމުގައި އަމިއްލަ ޕާޓީއެއް އުފައްދަވަން ވެސް މަސައްކަތް ކުރެއްވިއެވެ.

އެއަށްފަހު، މިދިޔަ އަހަރުގެ ޖޫން 25ގައި އޭނާ އަލުން އެމްޑީޕީއާ ގުޅިވަޑައިގަތީއެވެ.

އެމްޑީޕީގެ މިފަހަރުގެ ޕްރައިމަރީގައި ޖާބިރުގެ ދަރިފުޅު އަހްމަދު މުއާޒު ވެސް ވާދަކުރައްވައި ކެންޑިޑެސީ ހޯއްދެވިއެވެ. އޭނާ ހޯއްދެވީ އދ. މަހިބަދޫ ދާއިރާގެ ޓިކެޓެވެ.