ސަރުކާރުގެ މަސް ކުންފުނި، މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ)ގެ ތާރީހުގައި ވެސް އަލަށް އެ ކުންފުނީގެ ޗީފް އެގްޒެކިއުޓިވް އޮފިސާ (ސީއީއޯ) އަށް ބިދޭސީއަކު އައްޔަންކޮށްފި އެވެ.

މިފްކޯގެ ސީއީއޯގެ މަގާމު ހުސްވިތާ ހަތް މަސްފަހުން، އެ މަގާމަށް އައްޔަންކުރީ ޔޫކްރޭންގެ ރައްޔިތެއް ކަމުގައިވާ ޑރ. ވިތާލީ ލުބިމޮފް އެވެ.

މިފްކޯ އިން ބުނީ ވިޓާލީ މާދަމާ ހެނދުނުން ފެށިގެން ރަސްމީކޮށް މަގާމުގެ މަސްއޫލިއްޔަތުތަކާ އޭނާ ހަވާލުވެވަޑައިގަންނަވާނެ ކަމަށެވެ. ވިޓާލީގެ މުސާރައާއި އިނާޔަތްތަކުގެ ތަފްސީލްތައް ފަހުން ހާމަކުރާނެ ކަމަށްވެސް މިފްކޯ އިން ބުންޏެވެ.

މިފްކޯއަށް ސީއީއެއް ހޯދަން ޖުލައި މަހުން ފެށިގެން ވަނީ އިއުލާންކޮށްފަ އެވެ. މިފްކޯގެ ބޯޑަށް މަސްވެރިން ތަމްސީލްކުރާނޭ ޑިރެކްޓަރަކު ވަނީ ހަމަޖައްސައިފަ އެވެ. 

މިފްކޯގެ ސީއީއޯގެ މަގާމަށް ބިދޭސީއަކު ހަމަޖެއްސިއިރު އެ ކުންފުންޏަށް މާލީ ބޮޑެތި މައްސަލަތަކެއް ކުރިމަތިވެ 1.2 ބިލިއަން ރުފިޔާއަށް ވުރެ ދަރަނި ބޮޑެވެ.