ލައިފް ސްޓައިލު ބިހޭވިއަރތަކަށް އާސަންދައިން ޚަރަދުކުރުމަކީ ބަލައިގަނެވޭނެކަމެއް ނޫންކަމަށް، ދިވެހި ރައްޔިތުންނަށް ހުސްނުވާ އާސަންދަ ތައާރަފްކޮށްދެއްވި މޭސްތިރިޔާ ރައީސް އަބްދުﷲ ޔާމީން ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ މިރޭ ޕީއެންއެފުން ބޭއްވި ޖަލްސާގައި ވާހަކަފުޅު ދައްކަވަމުންނެވެ.

ދުންފަތުގެ އިސްތިއުމާލު ކުރާ ނަމަވެސް އެ އާދައިން މިންޖުވާން ބޭނުންވާ ފަރާތްތަކަށް އާސައިންދައިން ހޭދަކުރަން ލިބޭނެ ކަމަށް ހެލްތު މިނިސްޓަރު އަބްދުﷲ ނާޒިމް ވިދާޅުވެފައިވާތީ އެކަމަށް އިޝާރާތްކުރައްވާ ރައީސް ޔާމީން ވިދާޅުވީ، ބަޖެޓު ޑެފިސިޓުވެ ދަރަނި މައްޗަށް ގޮސްފައިވާ ކަމަށްބުނެ ރައްޔިތުންނަށް ދޭ ސަބްސިޑީތަކުގެ ތެރޭގައި ހިމެނޭ އާސަންދަ ކަނޑާލަން ނިންމާފައިވާއިރު ސިނގިރޭޓު ހުއްޓަން ބޭނުންވާ މީހުންނަށް އާސައިންދައިން ޚަރަދުކުރާތީ އަޖައިބުވެވަޑައިގަންނަވާ ކަމަށް ބޮޑެތި ބަލިތަކަށް ބޭސްފަރުވާ ކުރާ މީހުންގެ ޞޭސް ފަރުވާގެ ފައިސާއިން މަދުކޮށް ދުންފަތުގެ އިސްތިއުމާލު ކުރާ މީހުން އެކަން ކުރުން ހުއްޓުވަން އާސައިންދައިން ޚަރަދު ކުރުމަކީ އެއީ އިންސާފުނޫން ކަމަށް ވެސް ރައީސް ޔާމީން ވިދާޅުވިއެވެ.

ރައީސް ޔާމީން އިތުރަށް ވިދާޅުވީ އެންޓި ކޮރަޕްޝަން ދުވަސް ފާހަގަކުރާއިރު އެކަމުގެ ވާހަކަ ދައްކާލަން ރައީސް މުހައްމަދު މުއިއްޒަށް ކެރިވަޑައިނުގަންނަވާނެ ކަމަށާ އެއީ ޚުދު އެމަނިކުފާނަށް އަމާޒުވާ ކޮރަޕްޝަންގެ އެތައް ތުހުމަތު ހުރުމުން ކަމަށްވެސް ރައީސް ޔާމީން ވިދާޅުވިއެވެ.