"ގާނޫނު އަސާސީގެ ދިފާއު"ގެ ނަމުގައި މޯލްޑިވިއަން ޑިމޮކްރެޓިކު ޕާޓީ (އެމްޑީޕީ)އިން އިސްނަގައިގެން މިރޭ ކާނިވާ ސަރަހައްދުގައި ބާއްވާ އެއްވުމަށް ސަރުކާރު މުވައްޒަފުން ދިޔަނުދިނުމަށް މަޅިޖަހަން ފަށައިފިއެވެ.

އެގޮތުން ސަރުކާރުން ވަނީ އެމްޑީޕީގެ ޖަލްސާއަށް މީހުން ހިނގައިދާނޭތީ ސަރުކާރުގެ އޮފީސްތަކާ ކުންފުނިތަކުން މުވައްޒަފުންނަށް އަމާޒުކޮށްކަމަށް ބުނެ ތަފާތު އެކި ކަންކަން އޮފީސްތަކުގައި މިރޭ ބޭއްވުމަށް ނިންމާ މުވައްޒަފުން ބަންނަން ފަށާފައެވެ.

ކުންފުނިތަކުންވެސް ވަނީ މި އުސޫލުން ކަންކަން ރާވާ ގަޑިކިޔާ ހުރިހާ މުުވައްޒަފުންވެސް ގަޑިއަށް ހާޒިރުވުމަށް އަންގަމުންނެވެ. މީގެ ތެރޭގައި ހިމެނޭ ހުރިހާ ބައްދަލުވުމެއްވެސް ތާވަލްކޮށްފައިވަނި އެމްޑީޕީ ޖަލްސާގެ ގަޑިއާ ދިމާކޮށެވެ.

އެމްޑީޕީއިން މިރޭ ބާއްވާ އެއްވުމަކީ ގާނޫނު އަސާސީއަށް ގެނައި ހަތް ވަނަ އިސްލާހާ ގުޅިގެން ހިތްހަމަ ނުޖެހުން ފާޅުކުރުމަށް ބާއްވާ އެއްވުމެކެވެ. އެގޮތުން ސިޔާސީ ޕާޓީއެއްގެ ފަރާތުން މަޖިލިސް އިންތިހާބުގައި ވާދަ ކޮށްގެން އިންތިހާބުވުމަށް ފަހު އެ ދައުރުގެ ތެރޭގައި އެ ޕާޓީއަކުން ވަކިވެއްޖެ ނަމަ ނުވަތަ ޕާޓީން ވަކިކޮށްފިނަމަ ނުވަތަ އެހެން ޕާޓީއެއްގެ މެންބަރަކަށް ވެއްޖެނަމަ އެ މީހަކު މަޖިލިހުގެ މެންބަރުކަމުން ވަކިވާނެހެން އިސްލާހު ވަނީ ގެނެސްފައިވާތީ އާ ގާނޫނު އަސާސީގައި ބުނާ މިނިވަން މުއައްސަސާތަކަށް ވެރިން އައްޔަންކުރުންވެސް ރައީސުލްޖުމްހޫރިއްޔާގެ ބާރުތަކުގެ ތެރޭގަިއ ހިމަނާ އިސްލާހު ފާސްކުރުމުން އެކަމާ ދެކޮޅަށް އަޑުއުފުލުމަށް ބާއްވާ އެއްވުމެކެވެ.