ވެރިން ޚިޔާނާތްތެރިވަންޏާ މަގާމުން ދުރަށް ދާން ޖެހޭ ކަމަށާ ނުވަތަ ދުރަށް ލާން ޖެހޭކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

ޕިއެންއެފުން ބުރާސްފަތި ދުވަހުގެ ރޭ ބޭއްވި ޖަލްސާގައި ވާހަކަފުޅު ދައްކަވަމުން ރައީސް ޔާމީން ވަނީ ގައުމުގެ ކުންފުނިތަކުގެ ތެރެއިން ވައްކަން ވެރިން ކުރަމުން ދާކަން ހާމަވަމުންދާކަން ފާހަގަކުރައްވާފައެވެ. އަދި އެފަދަ ބޮޑެތި ވައްކަންތައް ކުރަމުން ގެންދާ ވެރިން އެގެންދަނީ ރައްޔިތުންގެ ފައިސާއަށް ޚިޔާނާތްތެރިވެ ގައުމަށް ޣައްދާރުވަމުން ކަމަށާ ޑިމޮކްރެސީގެ ރީތި ހަމަތަކަށް އަމަލުކުރާ އަދި ތަބާވާ ވެރިންތަކެއް ނަމަ މަގާމުން ދުރަށް ގޮސް ތުހުމަތުތައް ތަހުގީގުކުރަން ފުރުސަތު ދޭން ވާނެ ކަމާ ނުވަތަ އެ ފަދަ ވެރިން މަގާމުތަކުން ދުރުކޮށް އެކަންކަން ތަހުގީގުކުރަން ޖެހޭ ކަމަށްވެސް ރައީސް ޔާމީން ވިދާޅުވިއެވެ.

ރައީސް ޔާމީން ވިދާޅުވީ ދައުލަތުން ކުންފުނިތަކުން އުފައްދަނީ ދެ ސަބަބަކަށްޓަކައި ކަމަށެވެ. އެގޮތުން ފުރަތަމަ ސަބަބަކީ އެ ހިދުމަތެއްގެ ބޮޑުކަމާއި ބުރަކަމުން އާންމު ވިޔަފާރިތަކަށް އެ ހިދުމަތެއް ފޯރުކޮށްދޭން އުދަގޫވާ ފަދަ ހިދުމަތްތައް ފޯރުކޮށްދިނުން ކަމަށެވެ.

ރައީސް ޔާމީން ފާހަގަކުރެއްވި ގޮތުގައި އެމްއޭސީއެލުން ފޯރުކޮށްދޭ ހިދުމަތަކީ އާންމު ވިޔަފާރިއަކަށް ފޯރުކޮށްދެވޭ ވަރަށްވުރެ ބޮޑު ހިދުމަތަކަށްވާތީ އަދި ވައިގެ ދަތުރުފަތުރުގެ ސަލާމަަތް ފަދަ އެތައް ކަމަކަށް ނޭދެވޭ އަސަރެއް ނުފޯރާނެކަން ކަށަވަރުކުރުމަށް އެމްއޭސީއެލްއަކީ ސަރުކާރުން ހިންގަަންޖެހޭ ކުންފުންޏެކެވެ. 

އެމްއޭސީއެލްއާއި އެސްޓީއޯއަކީ ދައުލަތުގެ ކުންފުނިތަކުގެ ތެރެއިން އެންމެ ބޮޑު ފައިދާއެއް ލިބޭ ދެ ކުންފުނިކަން ފާހަގަކުރައްވައި ރައީސް ޔާމީނު ވިދާޅުވީ އެ ދެ ކުންފުނީގެ އެންމެ މައިގަނޑު މަގުސަދަކަށްވާންވާނީ އެކަށީގެންވާ މިންވަރުގެ ޑިވިޑެންޑެއް ދައުލަތަށް ދެއްކުން ކަމަށެވެ. 

ސޯޝަލް މީޑިޔާގައި އެމްއޭސީއެލްއަށް ކުރެވޭ ބައެއް ތުހުމަތުތައް ރައީސް ޔާމީނު ތަކުރާރުކުރެއްވި އެވެ. އޭގެ ތެރޭގައި އެމްއޭސީއެލްއަށް 70 އެތައް މިލިއަން ރުފިޔާއެއް ހަރަދުކޮށްގެން ލެޕްޓޮޕުތަކެއް ހޯދަން އުޅުމާއި ބާ ޓާމިނަލުގެ ބޭރުގައި އޭސީތަކެއް ހަރުކުރުމާއި އެއާޕޯޓުގެ ކުނި ނެގުން ބޮޑު އަގުގައި އަމިއްލަ ފަރާތަކާ ހަވާލުކުރުން ފަދަ ތުހުމަތުތައް ހިމެނެއެވެ. 

ރައީސް ޔާމީން ވިދާޅުވި ގޮތުގައި އެމްއޭސީއެލްއިން ކުރަމުންދާ ހަރަދުތަކަކީ ކުރަންޖެހޭ ހަރަދުތަކެއް ނޫނެވެ. އަދި އެ ފައިސާއަކީ އެ ކުންފުނިން ދައުލަތަށް ދައްކަންޖެހޭ ފައިސާއެއް ކަމަށްވެސް ރައީސް ޔާމީނު ވިދާޅުވި އެވެ. 

އެކަންކަން ފާހަގަކުރައްވައި ރައީސް ޔާމީން ވިދާޅުވީ ގުޑް ގަވަނެންސްގެ އުސޫލަކީ މިހާރު އެމްޑީގެ މަގާމުގައި ހުންނެވި ބޭފުޅާ މަގާމުން ދުރަށް ވަޑައިގަތުން ނުވަތަ ސަރުކާރުން އެ ބޭފުޅާ މަގާމުން ވަކިކުރުން ކަމަށެވެ. 

ރައީސް ޔާމީން ވިދާޅުވީ، މިއަދު ފެނިގެން ދަނީ ސަރުކާރުގެ ތެރެއިން ދެ ފެކްޝަނެއް އުފެދި އެއް ފެކްޝަނަށްވުރެ އަނެއް ފެކްޝަންގެ ބާރު ގަދަކުރަން ސަރުކާރުގެ ތެރެއިން މަސައކްަތްކުރާ މަންޒަރު ކަމަށާ އެހެންކަމުން ބާރު އޮތް ފެކްޝަނުން ބާރު ކުޑަ ފެކްޝަނަށް ނިސްބަތްވާ މީހުންނަށް އެކި ކަހަލަ ތުހުމަތުތައް އަމާޒުކޮށް މަގާމުތަކުން ވަކިކުރަމުންދާ މަންޒަރުވެސް ފެންނަ ކަމަށެވެ. ނަމަވެސް އެއީ ވަކި ފެކްޝަނަކަސް ނިސްބަތްވެގެން އަޅަން ޖެހޭ ފިޔަވަޅެއް ނޫން ކަމަށާ އެއީ ރައްޔިތުންގެ ފައިސާއަށް ޚިޔާނާތްތެރިވާ ކޮންމެ މީހަކާ މެދު އަޅަން ޖެހޭނެ ފިޔަވަޅެއް ކަމަށްވެސް ރައީސް ޔާމީން ވިދާޅުވިއެވެ.