މިދިޔަ އަންގާރަ ދުވަހުގެ ރޭ ޕީއެސްއެމްގެ ހަބަރެއްގައި ބޭއަދަބީ މަންޒަރެއް ހިމެނެވިފައިވާތީ އެ ތަނުން މާފަށް އެދި، އިހުމާލުވި މުވައްޒަފުން ސަސްޕެންޑްކޮށްފި އެވެ.

ޕީއެސްއެމް އިން ރޭ ނެރުނު ނޫސްބަޔާނެއްގައި ބުނެފައި ވަނީ މިދިޔަ އަންގާރަ ދުވަހުގެ ރޭ ދެއްކުނު މަންޒަރަކީ އެ ކުންފުނީގެ ކޮންޓެންޓް ޕޮލިސީއާއި އެޑިޓޯރިއަލް ޕޮލިސީއާ ހިލާފު ސީރިއަސް މައްސަލައެއް ކަމަށެވެ.

މި މައްސަލައިގައި ކަންހިނގައިދިޔަ ގޮތް ބެލުމަށްފަހު، އިހުމާލުވި ދެ މުވައްޒަފުން ސަސްޕެންޑްކޮށް، އެ މުވައްޒަފުންގެ މައްސަލަ ކަމާބެހޭ ކޮމެޓީއަށް ފޮނުވާފައިވާ ކަމަށް ވެސް އެ ބަޔާނުގައިވެ އެވެ. މުވައްޒަފުންގެ މައްސަލަ ބަލައި، އަޅަން ޖެހޭ ފިޔަވަޅު އަޅާނެ ކަމަށް ވެސް އެ ކުންފުނިން ބުންޏެވެ.

ޕީއެސްއެމް އިން ބުނީ ކުންފުނީގެ އެކިއެކި ޑިޕާޓްމެންޓްތަކުގައި މިހާރު އަމަލުކުރަމުންދާ އެސްއޯޕީތައް އިސްލާހުކޮށް، މިފަދަ ކަންކަން ތަކުރާރުނުވާނެ ގޮތަކަށް އޮޕަރޭޝަނަލް ކަންކަން ތަރުތީބުކުރަމުންދާ ކަމަށެވެ.

ރައީސް މުހައްމަދު މުއިއްޒު އއ. އަތޮޅަށް ކުރެއްވި ދަތުރުގައި، ޖަލްސާއެއްގައި ގުރުއާން ކިޔަވަމުން ދަނިކޮށް ކަލިމައެއް އުނިވި މައްސަލަައެއް ވެސް އެ ތަނުން ދަނީ ބަލަމުންނެވެ. އެއީ ޓެކްނިކަލް މައްސަލައެއް ކަމާއި އެކަމަކު ކަމާގުޅޭ ފަރާތްތަކާ މެދު ފިޔަވަޅު އަޅާނެ ކަމަށް ޕީއެސްއެމްއިން ބުނެފައިވެ އެވެ.