ތައުލީމެއް ނެތް މީހެއްކަމަށް ރައްޔިތުން ބުނުމުން، ލަންކާގެ މަޖިލިސް ރައީސް އިސްތިއުފާ ދެއްވައިފި އެވެ.

ލަންކާގެ މީޑިއާތަކުން ބުނީ އަސޯކާ ރަންވާލަ އިސްތިއުފާ ދެއްވީ، އޭނާގެ ތައުލީމީ ފެންވަރާ މެދު ސުވާލު އުފައްދައި، އެކަމާ ގުޅޭ ގޮތުން ގިނަ ރައްޔިތުންގެ ފާޑުކިއުންތައް އަމާޒުވުމުން ނެވެ.

މަގާމުން އިސްތިއުފާ ދެއްވިކަން އިއުލާން ކުރައްވަައި ރަންވާލަ ވިދާޅުވީ އޭނާ އެއްވެސް ދޮގު މައުލޫމާތެއް ރައްޔިތުންނަށް އަދި އެއް ވެސް އިދާރާ އަކަށް ދީފަ ނުވާނެ ކަމަށާއި، ނަމަވެސް މިވަގުތު ބައެއް ލިޔެކިޔުންތައް ނެތުމުގެ ސަބަބުން ތައުލީމީ ފެންވަރު ސާބިތުކޮށްދިނުމަށް ދަތިވާ ކަމަށެވެ.

މި ސަބަބައްޓަކައި ސަރުކާރަށް ރައްޔިތުންގެ އިތުބާރު އުފައްދަން ބޭނުން ވާތީ އިސްތިއުފާ ދެއްވީ ކަމަށެވެ.

ރަންވާލަގެ މި ނިންމެވުމާއި ގުޅިގެން ގިނަބަޔަކު އަންނަނީ އޭނާ ހުރީ ރައްޔިތުންގެ ފަޅީގައި ކަމަށް ބުނެ އޭނާގެ ހިތްވަރަށް ސާބަސް ދެމުންނެވެ. އަދި ރައްޔިތުންގެ އަޑު އާ ސަރުކާރުގެ ވެރިން ވެސް އެހުމަށް ގިނަބަޔަކު ސަރުކާރުގެ ވެރިންނަށް އަންނަނީ ގޮވާލަމުން ނެވެ.

ރަންވާލަގެ ތައުލީމީ ސަނަދުތަކުގެ މައުލޫމާތު އޭނާގެ ލިންކްޑްއިން ޕްރޮފައިލްގައި އަދި ޕާލިމެންޓުގެ ރަސްމީ ވެބްސައިޓުގައި ހިމަނާފައިވެ އެވެ. އޭގައި އޭނާ ޖަޕާނުގެ ވަސެދާ ޔުނިވަރސިޓީން ބަޔޯކެމިސްޓްރީގެ ޕީއެޗްޑީއެއް އަދި މޮރަޓުވާ ޔުނިވަރސިޓީން ކެމިކަލް އިންޖިނިއަރިންގ ޑިގްރީއެއް ހާސިލުކުރައްވާފައިވާ ކަމަށް ދައްކަ އެވެ.

ނަމަވެސް، މި މައުލޫމާތުތަކުގެ ސައްހާކަމާމެދު އާންމުންގެ މެދުގައި ސުވާލު އުފެދި، ގިނަބައެއްގެ ފާޑުކިޔުންތައް އިތުރުވުމާ ގުޅިގެން، އޭނާގެ ޕްރޮފައިލް އަޕްޑޭޓްކޮށް، "ޑޮކްޓަރ" މަގާމު ނަން އުނިކޮށްފައި އެވެ.