ސްރީލަންކާގެ އާ ރައީސް އަނޫރަ ކުމާރަ ޑިސަނަޔަ ގައުމުން ބޭރަށް ކުރައްވާ ފުރަތަމަ ދަތުރުގައި އަވައްޓެރި އިންޑިއާ އަށް އިއްޔެ ވަޑައިގެންފި އެވެ.

ތިން ދުވަހުގެ މި ދަތުރުގައި އިންޑިއާގެ ބޮޑުވަޒީރު ނަރެންދުރަ މޯދީ އާއި ރައީސް ޑްރޫޕަދީ މުރުމުއާ މިއަދު ބައްދަލު ކުރައްވައި، މަތީ ފެންވަރުގެ މަޝްވަރާތަކެއް ކުރެއްވުމަށް ވަނީ ހަމަޖެހިފަ އެވެ.

އިގުތިސާދީ ދާއިރާއިން އެއްބާރުލުމާއި ވިޔަފާރި އާއި ސަރަހައްދީ ސަލާމަތާބެހޭ ގޮތުން ގުޅުމުގެ ބަދަހިކުރަން ދެ ގައުމުގެ ލީޑަރުން މަޝްވަރާ ކުރައްވާނެ އެވެ. އަދި މި ދާއިރާތަކުން ހަތަރު އެއްބަސްވުންތަކުގައި ސޮއި ކުރާނެ އެވެ. އޭގެ ތެރޭގައި ސައިބާސެކިއުރިޓީއާ ގުޅޭ އެއްބަސްވުމެއް ހިމެނޭ ކަމަށް މީޑިއާތަކުން ރިޕޯޓުކުރެ އެވެ.

މިދިޔަ ސެޕްޓެމްބަރު މަހުގެ 23 ގައި ވެރިކަމާ ހަވާލުވެވަޑައިގަތް އަނޫރާގެ އިންޑިއާ ދަތުރު ނިންމަވައިލައްވާނީ މާދަމާ އެވެ.

ސެޕްޓެމްބަރު މަހު ބޭއްވި ރިޔާސީ އިންތިހާބު ކާމިޔާބު ކުރެއްވި އަނޫރާ ވަނީ ލަންކާގައި އެންމެ ފަހުން ބޭއްވި މަޖިލީހުގެ އިންތިހާބުގެ ސާފު އަގުލަބިއްޔަތެއް ވެސް ހޯއްދަވާފަ އެވެ.

ލަންކާގެ އިގުތިސާދަށް އޮތް އެންމެ ބޮޑު ނުތަނަވަސް ކަމަކީ ކޮރަޕްޝަން ކަމަށް އަނޫރާ ވިދާޅުވެ އެވެ. ނިކަމެތި މީހާއަށް ވަޒީފާއެއް ނުދެވިގެން އުޅެނީ މަޝްހޫރުކަން ހޯދަން ވެރިން މަސައްކަތްކުރާތީ ކަމަށް ވެސް އޭނާ ވިދާޅުވެ އެވެ.

ޑިސެނަޔަކަ ވެރިކަމަށް ވަޑައިގަތީ ލަންކާއަށް އިގްތިސާދީ ކާރިސާއެއް ކުރިމަތިވުމުން އުފެދުނު ހަމަނުޖެހުންތަކުގައި އޭރުގެ ރައީސް ގޯޓާބަޔަ ރާޖަޕަކްސަ މަގާމުން އިސްތިއުފާ ދެއްވިތާ ދެ އަހަރު ފަހުން ބޭއްވި އިންތިޚާބުގައެވެ. އޭނާ ވަނީ ކޮރަޕްޝަނާ ދެކޮޅަށް މަސައްކަތްކޮށް، ވަގަށް ނަގާފައިވާ މުދާ އަނބުރާ ހޯދާނެ ކަމަށް ވައުދުވެ ވަޑައިގެންފަ އެވެ.