އައިޖީއެމްއެޗުގައި މަސައްކަތްކުރަމުންދިޔަ ފިލިޕީންސްގެ ނަރުހެއް ކަމަށްވާ މޭރީ ގްރޭސް މަރާލި މައްސަލައިގައި ހައްޔަރުކޮށް ދައުވާ އުފުލާފައިވާ ހަލީމަތު ލަމްހާ ބަންދުން ދޫކޮށްލި މައްސަލަ ބަލައިނުގަންނަން ހައި ކޯޓުން ނިންމުމުން ސުޕްރީމް ކޯޓަށް ހުށަހަޅައިފި އެވެ.

ލަމްހާގެ ދޫކޮށްލީ ދައުލަތުގެ ގިނަ ހެކިންތަކެއްގެ ހެކިބަސް ނަގަފައިވާތި އާއި ބާކީ ތިބި ހެކިންނަކީ ބަންދުން ދޫކޮށްލިޔަސް ހެއްކަށް ނުފޫޒު ފޯރުވުމުގެ ފުރުސަތު ކުޑަ ހެކިތަކަކަށް ވާތީ ކަމަށް ބުނެ އެވެ. ލަމްހާ ދޫކޮށްލާފައި ވަނީ ހަ ޝަރުތަކާ އެކުގައެވެ. އެއީ އޭނާ ރާއްޖެއިން ފުރައިގެން ނުދިއުމާއި، ގާނޫނާ ހިލާފު އަމަލެއް ނުކުރުމާއި، ކޯޓަށް ގަޑިއަށް ހާޒިރުވުމާއި، ޒަރޫރީ ބޭނުމެއްގައި ނޫނީ ގެއިން ބޭރަށް ނުދިއުމާއި، މައްސަލައިގެ ހެކިންނާއި މޭރީގެ އާއިލާއާ ބައްދަލު ނުކުރުމާއި، ވަކި ގަޑިތަކެއްގައި ގޭގައި ހުރުމެވެ.

ދައުލަތުން މި މައްސަލާގައި ލަމްހާގެ މައްޗަށް ތިން ދައުވާއެއް އުފުލާފައި ވެއެވެ. މީގެތެރޭގައި މޭރީގެ މަރުގައި އެހީތެރިވެދިނުމުގެ ދައުވާ ހިމެނެ އެވެ. މި މައްސަލާގައި މޭރީގެ ފިރިމީހާ މާވިންގެ މައްޗަށް ގަސްދުގައި މީހަކު މަރާލުމުގެ ދައުވާ ކޮށްފައިވެ އެވެ.

މި މައްސަލައިގައި ލަމްހާ ކުރިންވެސް ދޫކޮށްލުމުން ދައުލަތުން ހައިކޯޓަށް ގޮސްގެން އަލުން ލަމްހާ ބަންދު ކުރި އެވެ. ނަމަވެސް ފަހުން މިފަހުން ލަމްހާގެ މައްސަލަ ޕީޖީ އޮފީހުގެ ފަރާތުން ހައިކޯޓުގައި އިސްތިއުނާފު ކުރުމުން، ރަޖިސްޓްރާ ވަނީ މައްސަލަ ބަލައިނުގަންނަން ނިންމާފަ އެވެ. އެ ނިންމުމަށް ފަނޑިޔާރުންގެ މަޖިލީހުން ވެސް ވަނީ ތާއީދު ކޮށްފަ އެވެ.

އެހެންވެ، ހައިކޯޓުގެ ރަޖިސްޓްރާގެ ނިންމުމާއި ފަނޑިޔާރުންގެ މަޖިލީހުގެ ނިންމުން ސުޕްރީމް ކޯޓުގައި އިސްތިއުނާފު ކުރާނެ ކަމަށް ޕީޖީ އޮފީހުން މިއަދު ވަނީ ބުނެފަ އެވެ.

އޮކްޓޯބަރު 2021 ގައި އައިޖީއެމްއެޗްގައި މަސައްކަތްކުރި މޭރީ މަރާލި މައްސަލާގައި ދައުލަތުން ދައުވާ ކުރަނީ މޭރީގެ ފިރިމީހާ މާވިން އެސްވައި އާއި ލަމްހާގެ މައްޗަށެވެ.

ދައުލަތުން ބުނާ ގޮތުގައި، މޭރީ މަރާލުމަށްފަހު މާވިންއާއި ލަމްހާ މަސައްކަތް ކޮށްފައި ވަނީ ދަންޖެހުނު ކަމަށް ހެދުމަށެވެ. ނަމަވެސް މޭރީ މަރުވެފައި ވަނީ ބޮލަށާއި ކަރަށް ލިބުނު އަނިޔާތަކުން ކަމަށް މެޑިކަލް ރިޕޯޓުތަކާ ހަވާލާދީ ދައުލަތުން ކުރިން ބުނެފައިވެ އެވެ.