ރައްޔިތުންގެ މަޖިލީހުން ރުހުން ނުދިން ތިން ވަޒީރުންނަށް ރުހުން ހޯދުމަށް އަލުން ރައްޔިތުންގެ މަޖިލީހަށް ހުށަހަޅައިފި އެވެ.
މި ވަޒީރުންނަށް ރުހުން ދިނުމަށް އެދި އަލުން މަޖިލީހަށް ފޮނުވާފައިވާކަން ރައްޔިތުންގެ މަޖިލީހުގެ ކޮމިޔުނިކޭޝަންސް ޑިރެކްޓަރު ހަސަން ޒިޔާއު ޗެނަލް 13 އަށް ވަނީ މައުލޫމާތުދީފައެވެ.
ވަޒީރުންނަށް ރުހުން ދޭން ދައުރުން ބޭރުން މިދިޔަ ޖެނުއަރީ 29 ގައި ބޭއްވި ޖަލްސާގައި މަޖިލީހުން ރުހުން ދީފައި ނުވަނީ ބަންޑާރަނައިބު އަހުމަދު އުޝާމާއި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދާއި ހައުސިން މިނިސްޓަރު ޑރ. އަލީ ހައިދަރަށެވެ.
ރުހުން ނުދިން ތިން ވަޒީރުން ވެސް އެ ދުވަހު އަނެއްކާވެސް އެ މަގާމުތަކަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ އަލުން އައްޔަންކުރައްވާފައެވެ.
ރުހުން ނުދިން ތިން ވަޒީރުން އަލުން އައްޔަންކޮށް ރުހުން ހޯދަން މަޖިލީހަށް ފޮނުވުމަކީ ގާނޫނު އަސާސީއާ ހިލާފު ކަމެއް ކަމަށް ބުނެ ގަލޮޅު އުތުރު ދާއިރާގެ ޑިމޮކްރެޓްސް މެމްބަރު އީވާ އަބްދުﷲ މަޖިލީހަށް ގަރާރެއް ވަނީ ހުށަހަޅާފައެވެ.
މިއީ ސަރުކާރަށް އޮތް އިތުބާރު ގެއްލި މަޖިލީހަށް ދީފައިވާ ބާރު ކަނޑުވާލުން ކަމަށް އީވާގެ ގަރާރުގައި ބަޔާންކޮށްފައިވެއެވެ.
