ރައީސް ޑރ މުހައްމަދު މުއިއްޒަކީ އުބައިޔު ބިން ސަލޫލުގެ ދެވަނައިގެ ގޮތުގައި، ރައްޔިތުންގެ މަޖިލީހުގެ ނޮޅިވަރަމް ދާއިރާގެ ކުރީގެ މެމްބަރު މުހައްމަދު ނަޝީދު އަބްދުﷲ (މޮސްޓާ) ސިފަކުރައްވައިފިއެވެ.

މޮސްޓަރ މިފަދަ ގޮތަށް ރައީސް މުއިއްޒު ސިފަކުރެއްވީ ޕީއެންއެފް އިން ރޭ ބޭއްވި ޖަލްސާގައި ބައިވެރިވަޑައިގެން ދެއްކެވި ވާހަކައިގައެވެ.

މޮސްޓަރ ވިދާޅުވީ، ރައީސް މުއިއްޒުއަކީ "ކައްޒާބެއް"ގެ ގޮތުގައި ގިނަ ބަޔަކު ސިފަކުރަމުން ގެންދާއިރު އޭނާއަށް ރައީސް މުއިއްޒު ސިފަވަނީ ކީރިތި ރަސޫލާ (ޞޢޥ)ގެ ސިޔަރަތުގައި ނަން އައިސްފައިވާ އުބައިޔު ބިން ސަލޫލުގެ ދެވަނައިގެ ގޮތުގައި ކަމަށެވެ.

އެހެން އެގޮތަށް ރައީސް މުއިއްޒު އޭނާއަށް ސިފަވާ ސަބަބެއް ކަމަށް މޮސްޓާ ވިދާޅުވެފައިވަނީ، އެމަނިކުފާނު ކަންކަން ކުރައްވަމުން ގެންދަވާ ގޮތުން ކަމަށެވެ. އެގޮތުން ނިމިދިޔަ ހަފްތާގެ ތެރޭގައި ހައުސިން މިނިސްޓްރީގެ އިތުރުން ދައުލަތުގެ އިތުރު ތިން މުއައްސަސާއެއް ހުރި ގްރީން ބިލްޑިން އަދާ ހުލިވެގެން ދިޔަ ހާދިސާގައިވެސް ވަރަށް ބޮޑެތި ރޭވުންތަކެއް ހުރި ކަމަށް މޮސްޓާ ތުހުމަތު ކުރައްވާފައިވެއެވެ.

މޮސްޓާ ވިދާޅުވި ގޮތުގައި އަލިފާނުގެ ހާދިސާ ހިނގި ދުވަހުގެ ކުރީރޭ ރައީސް މުއިއްޒުގެ އަމިއްލަ ގެކޮޅު މ. ދިމްޔާތުގައި ފުލުހުންނާ އެމްއެންޑީއެފްގެ އިސްވެރިންގެ ބައްދަލުވުންތަކެއް ކުރިއަށް ގެންދިޔަ ކަމަށާ އެގޮތުން ދަންވަރުގެ ވަގުތުގައި ދިމްޔާތުގައި ސަރުކާރުގެ އެންމެ މުހިއްމު ދެ މުއައްސަސާގެ ބައްދަލުވުންތަކެއް ކުރިއަށް ދިޔަ ސަބަބާ މެދު ސުވާލު އުފައްދަވާ މޮސްޓާ ވަނީ އެކަން ދިވެހި ރައްޔިތުންނަށް ސާފުކޮށްދޭން ޖެހޭނެ ކަމަށް ވިދާޅުވެފައެވެ.

ރައީސް މުއިއްޒަކީ އުބެއިއްޔު ބިން ސަލޫލުގެ ގޮތުގައި މޮސްޓާ ސިފަ ކުރައްވާފައިވާއިރު، އުބެއިއްޔު ބިން ސަލޫލަކީ ރަސޫލާ (ޞޢޥ)ގެ ޙަޔާތްޕުޅުގައި މަދީނާގައި އިސްލާމްދީން ޤަބޫލުކޮށްގެން ކަމަށް ދައްކައިގެން ނަމަވެސް މުޝްރިކުންނަށް ޚަބަރު ގެންގޮސްދޭ މީހެއްގެ ގޮތުގައި ހުރި މުނާފިގުންގެ ބޮޑެކެވެ.